Bot ekspres Sibu-Song-Kapit bedau ulih beoperasyen

KAPIT: Semua servis bot ekspres ti bejalai ari Sibu-Song-Kapit bedau beoperasyen berindik ari Komiti Penyangga Penusah Ngenyit Nengeri Sarawak (JPBNS) udah ngerintaika Sibu nyadi Zon Kuning ketegal pandemik Covid-19.

Ku Pengari Kaunsil Sungai Sarawak (LSS) Bagi Menua Kapit, pengawa nangguhka operasyen bot ekspres nya ketegal Sibu agi dirintai ba Zon Kuning.

“Operasyen bot ekspres ba pejalai ari Sibu-Song-Kapit agi ditangguh nyentuk dipadah baru,” ku iya madah, ditu tadi.
Taja pia ku iya, servis bot ekspres ungkup semua pejalai ba Bagi Menua Kapit udah beoperasyen baka selama bepun 13 Mei tu tadi.

Terang iya, pejalai tu nyengkaum ari Kapit-Nanga Gaat-Putai, Kapit- Pelagus enggau Kapit-Belaga

“Semua bot ekspres nya meseti nitihka semua Standard Atur Pengawa (SOP) ti ditetapka ngambi nyeliah ari kena rampit igi penyakit Covid-19.

“Entara SOP ti ditetapka iya nya penumpang enda tau enda ngena sengkabung mua kelimpah duduk jauh nitihka tanda ti udah ditetap.

“Penumpang mega meseti diperesa pengangat isi sebedau nepan bot ekspres enggau enda dikemendar ngetu ba sebarang endur nyentuk datai ba endur ti dituju,” tandu iya.

Ditanya sekalika servis nya nyentuk timpuh Atur Tagang Pejalai Besyarat (PKPB) abis kena 9 Jun tu, iya madahka pekara tu apin ditetap.

“Semua pekara tu bepanggai ba piak opis menteri bekaul lalu kami semina nitihka atur aja,” terang iya silik agi.