ARTIKEL

RANSING BELAJAR… Ukai semina rindu belajarka pengawa beranyam, Boy (belakang, tiga kanan) mega ransing ngulih penemu baru ngaga sugu tinggi.

Boy ransing belajar dikena nyungkak inovasyen

Facebook
Twitter
LinkedIn
WhatsApp
Telegram

TUSUN KETIGA

BA dunya injau tu, kitai ukai idup kediri aja tang idup dalam komuniti ti bemacham ulah enggau penatai lalu nya meh ti ngasuh kitai nyelai, kompleks sereta seruran bepanggai ba pangan diri.

Pia mega, kitai patut beterima kasih ngagai Petara laban Iya udah merekatka genap iku kitai ngena bemacham pengelebih enggau penau ba sesebengkah pekara tauka pengawa.

SILIK… Boy chukup silik lebuh beranyam laban iya sigi ngemeratka kualiti enggau kreativiti produk anyam diri.

Nya alai, kena meh penau ti dikembuan kitai nya enggau manah ke pemaik diri empu, ruang bilik enggau orang bukai ngelingi kitai.

Ba tusun ti dulu, Alexander anak Bara tauka Boy udah ngajar sereta nerang ngagai kitai rurun, chara enggau perengka pemun ba pengawa nganyam raga ngena tali kutak.

Penau beranyam nya enda ditengalika iya kediri aja tang bela dikunsika iya enggau kitai semua ke pemaik begulai ngambi kitai ulih begempung ngetan pesaka main asal kitai Iban tu.

Nyadi sekali tu, kitai deka ngenang pengeransing Boy ngajar sida ti deka belajar beranyam kelimpah ngulih penemu ari sida ti tebangkar bekaul pesaka main asal kitai Iban.

ENDA RANGKA PENEMU

Taja pen chukup kiruh enggau pangku pengawa diri nyadi siku Pemantu Pengerai Mensia Mayuh tang nya enda nagang iya bekunsika penemu beranyam ngagai orang bukai.

Lebuh bisi orang deka belajar beranyam, iya naka ulih magi awak diri ngajar sida laban muak ke siang iya gawa lalu muak ke malam iya beranyam dikena nangkup peminta bala penguna.

ANGKUN… Boy siku nembiak ti angkunka pesaka main asal Iban sereta enda leju belajar ari sida ti tebangkar nyengkaum pengawa betenun.

Boy madahka diri temegah ati ngajar sida laban iya rindu meda mayuh orang ransing belajar enggau ngemeranka pesaka main asal kitai tu.

Kenu ku iya, baka ijuk tampung penduk, baka rutan tampung danan, baka ira tampung lemba, baka wi tampung tali, pechah periuk tanah ganti periuk tani, padam bulan diganti matahari, parai orang ti tuai diganti tubuh kami, pambu orang ti dulu diganti rebak dudi.

“Pengawa beranyam tu siti ari seni pengelandik jari ti nyadi pesaka main asal bansa kitai ti diturunka aki ini kitai kelia lalu seruran ditampung nyentuk serak tubuh kitai.

“Baka aki ini ti udah ngajar kitai, baka nya mega kitai patut ngajar bala anak, uchu enggau ichit kitai beranyam ngambi pesaka berega tu meruan ditampung ari rebak siti ngagai rebak siti.

“Nya kebuah aku berasai temegah sereta gagit lebuh bisi orang deka belajar beranyam ari aku lalu kengka anak penemu ti dikembuan aku, nya meh ti diajar aku ngagai sida.

Baca lain  Peminta rayat Sarawak diperunding sebedau ngaga pemutus

“Naka diatu, mayuh ga sida ti udah belajar beranyam ari aku enda ngira penempa enggau umur taja pen bisi sekeda enda tentu beamat-amat deka belajar beranyam.

“Tebal agi awak dikena aku ngajar sida beranyam iya nya muak ke malam enggau ujung minggu lebuh tekenaka gintir aku enda gawa.

“Aku ngarap dudi hari ila mayuh agi rebak biak ngembuan penyedar deka ngenan pesaka main asal kitai tu sereta bisi minat deka belajar beranyam.

“Dikena nyapai juluk tu, aku meransang bala apai indai, pengajar, komuniti, gerempung ukai dikuasa perintah (NGO) sereta ejensi perintah tauka peribit ti bekaul chakah narak penyedar ngagai bala anak enggau rebak biak ngaul pengawa tu.

“Tu ukai pangku pengawa sekeda orang aja tang pangku pengawa kitai begulai iya nya aku enggau nuan,” ku iya.

Siti agi pekara ti ngasuh iya ransing deka ngajar orang bukai iya nya ulih mantu iya nambahka penemu enggau pengelandik ba pengawa beranyam.

Boy madah, lebuh iya ngajar orang bukai beranyam, ba maya sebaka iya mega bela belajar lalu nya ulih mantu iya nambah penemu enggau pengelandik diri ba pengawa nya.

RANSING NGULIH PENEMU

Ukai semina ransing ngajar orang bukai, Boy mega angkun deka belajarka mayuh agi penemu beranyam ari sida ti tuai sereta anda ba pengawa nya.

Lebuh meda orang tuai beranyam, iya suah betanya sereta bekunsi penemu enggau sida lalu ari nya iya bulih mayuh penemu baru ti beguna.

SEPENEKA MILIH… Sekeda produk anyam Boy ti bemacham chura, pemesai enggau peninggi.

Iya madah, pekara nya beguna amat dikena nyamin kualiti, kreativiti enggau nempa inovasyen ba produk anyam ngambi seruran nemban nitih ubah jeman sereta pemansang kemaya hari.

Pia mega, ku iya, pekara nya beguna amat ngambi kitai ulih besemekih enggau nyadi chunto tauka chuan ngagai orang bukai kelimpah ngemansangka penau diri ngagai tikas ti tinggi agi.

“Amat meh aku udah landik ba pengawa beranyam tang ukai reti aku enda ibuh agi belajar ari orang bukai ti tebangkar enggau bepenau agi.

“Kembuan meh ati ti semampai deka belajar enggau ngemaruhka diri empu laban engka penemu dikembuan kitai semina seraga aja tang orang bukai engka nyau setibang.

“Nya alai, aku enggai ngetu belajar ari orang bukai lalu penemu ti diulih nya beguna amat dikena aku ngemansangka diri empu sereta dikunsi enggau orang bukai ti belajar ari aku,” ku tusui Boy.

Baca lain  RM6.3 juta diagih ungkup 55 PDK di Sarawak

Nangkan nya, lebuh bisi pengawa tauka ngatur program ba rumah panjai, iya enda kakang ati ngaul sida ti ngemeranka pengawa beranyam kelebih agi orang tuai lalu belajar ari sida.

Nya siti ari peluang iya belajar, ngulih penemu baru sereta bekunsika penemu beranyam enggau orang bukai.

Boy siku nembiak ti angkun enggau ngemeranka pekara bekaul pesaka main asal kitai Iban lalu ukai semina bekaul pengawa beranyam aja.

Kelimpah pengawa beranyam, iya mega rindu sereta ransing belajar enggau ngulih penemu ba pekara bekaul pesaka berega kitai baka ngaga sugu tinggi, betenun enggau ti bukai.

Iya mega rindu ngumpul enggau nyimpan keresa lama baka tajau, baku, pua kumbu, dulang enggau ti bukai.

PINTAR NGUNA TEKNOLOGI

Premier Sarawak, Datuk Patinggi Tan Sri Abang Johari Tun Openg chakah mai rayat ba nengeri tu ngalih ngagai teknologi digital ba mayuh sukut dikena nyapai juluk nengeri maju manggai taun 2030.

Pengawa ngalih ngagai teknologi digital nya sekeda ari pugu Strategi Pemansang Pengudah COVID-19 (PCDS) 2030 ti dibantaika tuai jauh timpai nya.

NARIT ATI… Siti ari bakul ti dianyam Boy ti chukup narit ati.

Nya alai, pemansang enggau pengelebih teknologi digital kemaya hari meri pemaik ngagai Boy belajarka mayuh agi chara beranyam dikena nambah penemu diri.

Iya ngena pelasar media sosial baka Facebook enggau YouTube dikena nambah penemu sereta nyungkak kreativiti enggau inovasyen ba pengawa beranyam.

Bemacham gambar, penerang enggau video beranyam bisi dipandang sereta dikunsi ba sebelah media sosial lalu ari nya iya bulih mayuh agi penemu baru.

Berebak enggau nya, Boy madahka diri betuah laban pemansang teknologi digital meri mayuh pemaik ngagai iya ngulihka penemu bekaul pengawa beranyam kelimpah ngelakuka produk anyam diri.

Iya madah, baka orang bukai mega, iya bela ngena pelasar media sosial baka Facebook, WhatsApp enggau ti bukai dikena ngelakuka produk anyam diri.

“Chukup muntang laban diatu semua utai semina ba ujung tunjuk jari aja lalu bepanggai ba pengerajin kitai empu bekunsika gambar produk anyam diri ba sebelah media sosial.

“Nengah pengelebih teknologi digital tu, semua orang ulih meda produk anyam kitai laban nya nadai tatak ngagai sekeda endur enggau komuniti aja tang serata dunya ulih meda.

Baca lain  ACSJ Ke-6 nambah kategori baru

“Enti suba sebedau bisi teknologi digital tu, kitai semina ulih bedajaka produk anyam diri ba sebelah tamu tauka kedai lalu nya semina betatak ba siti endur tauka sebuah komuniti aja.

“Tu meh siti ari pemaik teknologi digital lalu nya kebuah Premier Sarawak chakah mai kitai ngalih ngagai ekonomi digital.

“Pekara tu seraris enggau juluk besai iya ti deka nempa Tanah Kenyalang tu nyadi mengeri maju enggau bepenatai pemisi besai manggai taun 2030 ila,” ku Boy.

Ukai naka nya aja, ku iya, diatu genap orang ngembuan telefon pintar lalu nengah teknologi nya sida ulih ngambi gambar tauka ngerikod video.

“Kekadang lebuh aku bejalai sebelah kedai, tamu tauka program eksibisyen kraf jari, aku suah ngambi gambar produk anyam ti bisi dijual tauka dipandang dia.

“Lebuh datai ba rumah, aku nguji belajar enggau ngaga kediri empu produk nya nundaka gambar ti diambi aku nya tadi,” ku iya.

PRODUK BEKUALITI NARIT ATI

Ba pengawa ngasilka produk anyam, pekara ti semampai dikemeratka Boy iya nya kualiti enggau kreativiti produk.

Kededua pekara tu beguna amat ngambi kitai ulih besemekih enggau orang bukai, narit ati bala penguna tauka pemeli, nyungkak inovasyen sereta mai seni pengelandik jari tu nuju penyulut besai.

Ku Boy, enti produk anyam kitai bisi kualiti enggau kreatif, udah tentu kitai empu ti ngaga kelebih agi bala pemeli tepantup ati meda pemanah produk nya.

“Pekara keterubah diperatika bala pemeli iya nya kualiti enggau kreativiti produk anyam, udah nya, baru sida beratika rega produk tu.

“Enti sida tepantup ati meda pemanah kualiti enggau kreativiti produk anyam ti digaga kitai, sida tentu deka meli produk tu taja rega produk tu mar agi ari orang bukai.

“Taja pia, ukai reti kitai sepeneka ati ngeletak rega produk anyam laban nya mungkur ungkus meli perengka dikena, kualiti perengka dikena, kreativiti, pengemas, pemesai produk, pengiruh sereta pemar ngaga enggau ti bukai.

“Enti produk anyam kitai nadai kualiti, udah tentu bala pemeli deka jera meli, dipejah enggau diviralka sida ba sebelah media sosial lalu nya ulih ngeruga periuk asi kitai empu ti bedagangka produk anyam tu,” ku terang Boy.

Iya nyemetak madah, nya kebuah beguna amat kitai ngemeratka kualiti enggau kreativiti produk anyam ti digaga kitai.

BERITA LAIN

Maul Lang puh nyapai juluk nyadi pemerindang

SYLVESTER RIANGsuarasarawak.news@gmail.com GENAP iku kitai bela ngembuan minat enggau juluk kediri empu ba sesebengkah pengawa tang ukai reti semua juluk nya ulih dikeamat baka ti

Sarawak nyadi pengeluar besai lada ba Malaysia

MINDY VELARIE CASILYSuarasarawak.news@gmail.com SERIAN: Sarawak dirikod ngeluarka 31,994 tan metrik lada ba taun 2023. Sapit Menteri Industri Pemakai, Komoditi, enggau Pemansang Wilayah (M-FICORD), Datuk Martin

Simunjan deka disikap ngena palan komersial

SIMUNJAN: Projek pemansang komersial ba sitak Simunjan bisi pengulih nyungkak ekonomi peranak lokal kelebih agi bala pedagang mit. Projek nya mungkur pengawa ngaga medan selera,

RM10,000 nganti Kumang Gawai Betong 2024

BETONG: Pekit Kumang Bagi Menua Betong 2024 nesau bala indu dara bansa Dayak selampur menua Malaysia ke beumur 18 taun enggau tuai agi ngerebut perais

BERITA TERBARU

Dua bot ditahan langgar syarat sah lesen

TANJUNG MANIS: Agensi Penguatkuasaan Maritim Malaysia (Maritim Malaysia) Zon Maritim Tanjung Manis menahan dua bot tempatan selepas disyaki melanggar syarat sah lesen dalam satu operasi,