BSH renggat ketiga dibayar sebedau apus bulan tu

KUALA LUMPUR: Bantuan Sara Hidup (BSH) renggat ketiga ungkup penerima ke ukai diau ba kandang menua ulu Semenanjung, Sabah enggau Sarawak deka dibayar sebedau apus bulan Julai tu.

Menteri Wang, Datuk Seri Tengku Zafrul Abdul Azizmadah, bayar BSH renggat ketiga tu ngena belanja penyampau RM3 bilion ngaul 5 juta penerima iya nya 3.8 juta ketuai bilik enggau 1.2 juta orang bujang.

“Penerima kategori ketuai bilik ti nerima bantu RM600 deka nerima bantu tambah RM120 ungkup tiap anak (baruh 18 taun), maksimum empat iku anak.

“Ambika banding, ketuai bilik bepenatai pemisi kurang RM2,000 enggau empat iku anak deka nerima RM1,080,” ku iya meri penerang media Ripot Ke-11 Unit Pengatur enggau Peransang Ekonomi Entara Ejensi Nasional (Laksana) dikena bejalaika Pakej Peransang Ekonomi Prihatin Rakyat (PRIHATIN) enggau Pelin Nyungkak Baru Ekonomi Menua (Penjana), ditu sehari tu.

Tengku Zafrul madah, baka ti udah dibantai sebedau tu, atur bayar terus Bantuan Prihatin Nasional (BPN) sereta renggat kedua enggau ketiga BSH 2020 ba kandang menua ulu Sabah enggau Sarawak (nadai akaun bank) deka dipejalai bepun 1 ngagai 31 Julai ti disebela Perbendaharaan Malaysia Sabah (PMSabah) enggau Perbendaharaan Malaysia Sarawak (PMSarawak).

“Inisiatif tu mega pulaika pemanah ngagai 53,325 penerima ngena belanja RM28.7 juta,” ku iya.
Ngelansa pasal program i-Lestari KWSP, iya madah bisi 4.34 juta peminta udah dikemendar enggau ngeluarka duit penyampau RM2.17 bilion sebulan nyentuk 26 June tu tadi.

Tengku Zafrul mega madahka perintah beratka pengelikun rama rayat sereta bantu pakej Prihatin enggau Penjana ti fokus mantu rayat ba timpuh pandak tu.

“Perintah deka matau utai ke nyadi enggau berundingka chara mutarka pekara nya ungkup timpuh ke diatu enggau timpuh panjai.

Ku Tengku Zafrul, naka 26 June tu tadi, peminta Belanja Pinjau Mudah PKS (Dagang Mit enggau Jelan Pemesai) ti udah dikemendarka bank enggau disetuju terima PKS bekaul nya beungkus RM8.4 bilion ti deka meri pemaik ngagai 19,539 iku raban nya.

“Bagi Skim Kredit Mikro Bank Simpanan Nasional, bisi 7,577 peminta ari pedagang mikor udah dikemendar ngena belanja RM260.6 juta seraya bisi 25,071 permohonan program Tekun Nasional dikemendar beungkus RM191.50 juta,” ku iya nerang.

Nambahka nya ku iya, bagi Penjana di baruh program MY30, perintah udah ngagihka belanja RM200 juta ungkup dikena nadai betatak lebuh mayar RM1 sehari pengelama 30 hari ba semua perengka pengangkut rel Transit Aliran Ringan (LRT), Transit Aliran Massa (MRT), KL Monorail enggau servis bas BRT, Bas RapidKL sereta Bas Pengantara MRT di Lembah Klang.

“Naka 28 June, bisi 66,692 pas udah dijual seraya subsidi perintah ungkup pas nya beungkus RM11.3 juta,” tandu iya.

Berebak enggau nya ku Tengku Zafrul, program subsidi upah udah dikemanah ngena agih belanja RM5.3 bilion, pengereja sektor dagang temuai enggau sektor ti apin dikemendar beoperasyen sekumbang timpuh Atur Tagang Pejalai Besyarat (PKPB) ti diberi kemisi nadai begaji mega ulih nerima bantu tu enggau syarat subsidi tu diterima terus.

Pia mega, Tengku Zafrul madah, Penjana Kerjaya udah dilanchar di baruh Penjana dikena mantu pengawa dagang enggau rayat ti dituntung penusah ketegal pandemik Covid-19 ngaul agih belanja RM1.5 bilion bepun 15 June tu tadi
“Program tu dikena meransang enggau mantu sida ti benung ngiga pengawa puang,” ku iya ngelansa.

Beduduk ari nya ku iya, perintah mega ngagihka belanja RM108 juta ungkup bantu rama raban ti penusah di baruh Opis Menteri Pemansang Orang Indu, Ruang Bilik enggau Komuniti ke alai sida nerima lebih ari 28,000 iku indai tunggal ti baru rejister naka 25 June tu tadi.

“Nya alai, penerang ti udah diterima nya agi diperesa silik enggau haribulan bantu sekali RM300 nya dibayar deka dipadah dudi,” terang iya.

“Timpuh rejister ungkup bantu nya agi dibuka nyentuk 31 Oktober tu,” ku iya.-BERNAMA.