Buah pemansang infrastruktur ari Santiago

SANTIAGO, Chile: Menteri Kereja Raya Malaysia, Baru Bian, udah ngetuai raban diligit Opis Menteri Kereja Raya (KKR) ngulu Aum Besai Apec di Santiago, Chile.

Aum diatur dua hari berunggu berengkah ari 14 ngagai 15 Ogos tu tadi berambaika jaku Ari Amerika Latin Ke Apec: Pekara Nyata enggau Pemar Ba Kualiti Infrastruktur Nengah PPP’s tauka dalam jaku ribai From Latin America to APEC: Reality and Challenges for a Quality Infrastructure Through PPP’s’.

Ku Baru, iya temegah ati udah dikangau ngarika Malaysia nyadi kaban panel ba program randau tauka dikumbai Roundtable Session rambau Aum Apec nya.

Ba hari keterubah ku iya, batang jurai dibai dalam randau enggau rambai jaku Meransang Pemeranak Puku Peribit dalam Kualiti, Pengering enggau Penegap Infrastruktur tauka Promoting Private Investment in Quality, Sustainable and Resilient Infrastructure.

Udah nya ditangkan randau berambaika jaku Kualiti Infrastruktur ungkup Pemansang Wilayah tauka Quality Infrastructure for the Regional Development of Logistics, ba hari kedua.

BEKUNSI PENEMU… Baru Bian dipebasa nyadi kaban panel randau rambau Aum Apec, 13-14 Ogos tu tadi.

Sida mega bisi ngatur pejalai nemuai teknikal ngagai Gran Torre Santiago (Great Santiago Tower).

Great Santiago Tower iya nya begunan pemadu tinggi enggau peninggi 64 ringkat di Santiago, Chile, ti nyadi begunan pemadu tinggi di Amerika Latin.

Tu mega nyadi begunan kedua pemadu tinggi di Hemisfera Selatan enggau gaya langkar pemadu tinggi di belakang Q1 di Australia sereta ringkat pemadu tinggi endur diau pengudah Menara Eureka Australia.

Nitih ku penerang ku Baru, siku ari arkitek ti udah ngelangkar Gran Torre Santiago, benama César Pelli, arkitek bansa Argentina-Amerika, iya nya arkitek ti udah ngelangkar begunan dikemegah Malaysia, Menara Berkembar Petronas peninggi 88 ringkat.

Begunan tinggi digelar KLCC nya mega nyadi begunan tinggi besapit pemadu tinggi di dunya.

Sida mega bisi limpang nemuai meri basa ngagai Menteri Kereja Raya Chile, Alfredo Moreno berandauka pengulih enggau peluang kerejasama Malaysia – Chile ba bidang infrastruktur enggau pengawa berumah.

BASA KETUAI… Baru Bian nyuaka tepa ngagai Alfredo Moreno rambau pejalai nemuai meri basa ngagai menteri nya.

 

NELADAN PEMANSANG… Raban diligit KKR ngatur pejalai nemuai teknikal ngagai Gran Torre Santiago nyerumba Aum Apec di Santiago, Chile.

Suara Sarawak