KUCHING: Perintah Sarawak udah ngagihka belanja RM10 juta di baruh Bajet Sarawak 2022 dikena numbuhka Wang Turu Pesaka, Seni enggau Main Asal taun baru.
Kepala Menteri Datuk Patinggi Abang Johari Tun Openg madah, agih belanja nya dikena bejalaika program enggau promosyen dagang temuai di Sarawak ke ngembuan mayuh budaya enggay etnik sereta bemacham seni.
“Aku ngarapka kitai ulih nampung program ke sama ngambi nyendiaka peluang sereta nempa kerejasama akademik sereta pansik entara palan pelajar tinggi di Pulau Borneo enggau selampur menua.
“Kerejasama tu deka nyungkak nama Borneo nyadi palan eko-dagang temuai komersial nengah pengawa ngangkatka pesaka budaya Borneo ba renggat entarabansa,” terang iya.
Abang Johari mansutka jaku nya ba Pengawa Bejadika Aum Besai Entarabansa Ke-2 Sains Sosial dan Kemanusiaan 2021 (ICOSSH2021) enggau Besilih Sempekat Pemereti Ati (MoA) entara Perintah Sarawak enggau Universiti Putra Malaysia (UPM) pasal pengawa numbuhka Kursi Pehin Sri Adenan Satem di sebuah hotel, ensanus.
Ku Abang Johari, budaya mesti dijaga enggau dikemansang taja Perintah Sarawak benung ngemansangka ekonomi digital.
Ku iya, pakar kelebih agi bekaul enggau etnik di Sarawak enggau Borneo mesti bebendar bejalaika pengawa nyaga budaya asal kitai.
“Pansik tu deka nyaup ngangkatka agi pengeraja budaya di Sarawak sereta nentuka kelai budaya kitai tegap enggau dijaga manah,” ku iya nerang.
Nya alai, iya ngarapka penumbuh Kursi Pehin Sri Adenan Satem di Kampus UPM Bintulu tu deka ngemansang Kampus UPM Bintulu nyadi palan pemansik etnik Borneo di Sarawak bekaul budaya, jaku enggau ekonomi rama.
Ku iya, inisiatif UPM Bintulu nya fokus ngagai pansik etnik Sarawak nyadi bidang khas mesti dipejalai manah ngambi nyungkak ekonomi.
“Dikena nyukung inisiatif tu, Perintah Sarawak udah setuju numbuhka Kursi Pehin Sri Adenan Satem laban maya agi idup iya kala nyadi tuai ke nyukung inisiatif pasal seni enggau budaya tu.
“Aku pechaya, kursi pansik tu deka nyadi palan ngempung penerang pasal pesaka budaya ari bemacham etnik di Sarawak enggau Borneo laban enti enda diadu baka tu, pesaka nya deka ditinggal.
“Aku ngarapka Kursi Pehin Sri Adenan Satem deka nyungkak inisiatif pansik enggau ngetanka pengaya pesaka budaya asal Borneo ba tikas entarabansa,” terang iya.
Sama datai Menteri Dagang Temuai, Seni enggau Main Asal Datuk Seri Abdul Karim Rahman Hamzah, Chairman Kaunsil Direktor UPM Tengku Syarif Laksamana Perlis Dato’ Seri Diraja Syed Razlan Syed Putra Jamalullail, Sapit Mandal Chanselor UPM Profesor Hang Tuah Baharudin enggau Adun Tanjung Datu ke mega bini Adenan Satem, Datuk Amar Jamilah Anu
