Bujang Skrang: Liat ati ngading pendiau diri

Kemaya hari tu agi bisi bala kelebih agi nembiak rebak baru rindu nitih gaya tauka nyebut leka jaku ti bisi dikena, ke suah didinga kelebih agi dalam lagu.

Taja pia, tebal agi sida tu enda tentu nemu reti ke bendar sesebengkah rambai jaku nya.

Sida semina ngena jaku nya lebuh ke berandau enggau pangan diri tauka lebuh nulis karang ngaul leka tauka rambai jaku Bujang Skrang, ti suah nyadi buah jaku kitai besehari sehari.

Serak tu Suara Sarawak mai kitai beratika reti enggau penalam empas rambai jaku tu bemalinka artikel Bujang Skrang ti dibali ari http://ruaibujangskrang.blogspot.com/.

Ngena rambai jaku baka tu endang manah laban jaku tu suah agi dikumbai kitai dalam kategori jaku tuai tauka jaku dalam.

PEGI BELELANG… Baru angkat bujang udah dibai bala bukai ngiga pengidup ba menua orang.

Semina kitai patut bejimat lebuh ke ngena iya enggaika reti iya jauh limpang ari reti ke bendar.

Kitai bansa Dayak kelebih agi bansa Iban dipelaba suah amat ninga sereta besebutka leka jaku tu, nyadika jaku sema tauka sempama, bisi mega jaku tundi, bebuti enggau pangan diri.

Nya alai sekali tu kitai nguji ngenang eti rambai jaku tu ngambika bala nembiak redak rebak baru tau beratika reti iya ke bendar.

Nampung jerita sida ke tuai, asal gelar nama Bujang Skrang tu suba semina engkeman dikena anak lelaki ke datai ari menua Batang Skrang.

Taja pia, ketegal segang pemansang kemaya hari tu ke alai nadai salah gela tu mega dikena ngagai lelaki Iban ari bagi menua bukai.

LANDIK… Bujang Skrang belajarka mayuh macham penemu dikena beridup sekumbang bejalai ngiga pengidup.

Gelar nama Bujang Skrang bepun ari pengawa enggau pengidup anak lelaki orang Batang Skrang ke dulu suba tebilang amat pegi gawa ke menua bukai laban deka ngulihka pengidup sereta enggau penemu dikena ngidupka diri.

Bisi sekeda ari sida tu, tak semina baru angkat bujang tang udah dibai pegi nyempulang kaban aya tauka bala menyadi ke udah bisi peneleba pegi gawa ba menua bukai.

Lebuh gawa di menua orang, dia iya belajarka jalai ngereja mayuh macham pengawa, nitihka pengelandik enggau pemintar berunding belajarka jalai pengidup bansa bukai.

Tau mega dikumbai kitai nunda singkang bansa bukai ke udah dulu maju ba pengidup, chukup landik ngereja macham pengawa ngulihka pengidup ti menyana.

Berindik ari nya, kadang-kadang sida ke pegi gawa ke menua bukai suntuk amat penemu enggau pemandai pelajar sekula tang bepelasarka pengeransing enggau pengeliat ati.

PERAJA MATA INDU DARA… Taja umur udah lunggar mimit ari maya ti patut bebini, tang Bujang Skrang semampai diperening sida ke dara.

Ari ke nyau betaun-taun gawa sereta belajarka penemu baru enggau ngansah pengelandik di menua bukai, enda berasai umur tudah nyau majak tuai-setuai.

Taja pia, enti penemu enggau pengelandik ngereja pengawa dikena ngidupka diri agi apin bisi ke bekal dibai pulai, dia iya tetap agi ngemeranka pengawa gawa di menua orang nyentukka iya bisi utai ulih dibai pulai nyadika tanda anak Skrang udah pegi bekereja di menua orang.

Tanda dibai iya pulai tu endang dikemegah sida apai indai, sida sebilik enggau serumah, nyadi buah mulut sekayu menua ari utai ke diulih iya lebuh pegi gawa.

Ketegal ke lama rindang ngulihka penemu enggau reta di menua bukai, dia lebuh maya mulaika diri ke menua di rumah panjai, umur pan nyau udah tuai tang lalu apin bebini.

Ukai ketegal enggai bebini tumu tauka ukai ketegal orang indu enggai tang laban bekiraka pengidup ke dudi hari, berundingka pemesai tanggungpengawa ke disan.

Nya alai, lebuh apai-indai meda anak ti pulai pegi, bisi penemu enggau pengelandik ngereja pengawa dikena ngidupka diri, dia baru sida iya berunding ngiga indu dara ke patut ditanya nyadika menantu.

Umur amat udah lunggar tang Bujang Skrang ke udah pegi belelang gawa ke menua bukai amat diperening bala indu dara laban enda mayuh orang ke ulih beberita pegi gawa di menua orang.

Nya mih kebuah gelar nama Bujang Skrang lalu lekat nyadika jaku sema orang, baka Bujang Skrang, ke mai reti chukup besai sereta dikemegah orang ke ngempu gela.

Dalam bup Jaku Dalam (2006), reti rambai jaku Bujang Skrang nya bujang ke laun bebini taja umur nyau lunggar mimit ari maya ti patut endur numbuhka ruang bilik laban tembu kiruh ngading pendiau diri dulu.

Nya alai dikena nyimpulka kenang senentang rambai jaku Bujang Skrang tu nadai salah dipelaba reti tu dikerembai ukai semina orang bujang ari Skrang ke lunggar umur ke laun bebini tang mega orang bujang ari pelilih menua bukai.

Suara Sarawak