Bukit Assek meseti dikemansang baru

SIBU: Pemujur Gempung Parti Sarawak (GPS) ba penuduk Kunsil Nengeri (Dun) Bukit Assek ti endang majoriti pengundi bansa China ba Pengawa Bepilih Besai Nengeri Ke-12 (PRN12) ila beguna amat dikena nentuka langgur pemansang ba sitak tu.

Kepala Menteri Datuk Patinggi Abang Johari Tun Openg madah sitak nya patut dikemansangka baru laban pendiau tanah udah balat tekerap, tengelam, mayuh ai enggau nyamuk ti tau ngeruga pengerai rayat.

“Kitai udah bisi pelin besai dikena ngemansangka baru sitak tu.

“Nama pekara ke beguna diatu, penuduk Dun Bukit Assek meseti diambi GPS awakka kitai ulih ngemujurka juluk tu,” ku iya rambau Pengerami Makai Lemai Pengerami Chap Goh Mei diatur ba Dewan Suarah Sibu, malam ensana.

Berebak enggau nya, Abang Johari minta peranak Sibu seati anang pambar laban nya tau ngasuh diri empu rugi.

Iya mega meri chunto politik ti pambar ba raban bansa China di Semenanjung Malaysia balat meri pangka ngagai agenda pemansang.

“Kitai meseti gawa bebendar ngenegapka parti. Semua parti komponen GPS patut bekerejasama.

“Seagi kitai dalam GPS, kitai deka terus nyaga sereta negika hak Sarawak,” ku iya.

Nangkan nya, Abang Johari mega meri jamin perintah nengeri deka terus mantu sekula China di nengeri nengah pengawa meri agih belanja tambah RM9 juta ungkup taun tu pengudah nerima agih RM8 juta taun nyin kemari lalu ditambah baru enggau agih RM1 juta.

Suara Sarawak