Bukit Sadok pematak temuai

BETONG: Bukit Sadok mayuh endur ti nyimpan jerita lama ti agi diintu meruan nyentuk diatu kelimpah pemanah rampa menua ke bisi dia.

Pengelicha Politeknik METrO Betong Sarawak (PMBS), Hanif Hasan madah, pengulih Bukit Sadok diangkat nyadi produk dagang temuai Sarawak chukup besai.

“Nyadi sebagi ari palan pematak temuai ba Bagi Menua Betong ulih meri penguntung besai ngagai peranak ditu sereta pemain industri bekaul bukai.

“Kebuah pia laban Bukit Sadok ti nyadi Kubu Panglima Rentap suba ngembuan mayuh jerita lama ti mengkan diintu enggau meruan sereta pemanah rampa menua ulih ditimpai ari tuchung bukit tau ngasuh ati lantang,” terang iya.

Hanif ti mega Direktor Program Nujah Bukit Sadok begulai enggau Ahmad Nazrin Ab Aziz mansutka jaku nya pengudah tembu aktiviti nya ditu, apin lama ke udah.

Ku iya, kaul kerejasama rat PMBS enggau peranak menua nya ti nyadi malin temuai mega mujur meri pemujur ngagai pejalai program napatka Bukit Sadok.

“Kelimpah ari program tu ngaul bala nembiak, kitai mega mai sida tu ngasaika peneleba baru betikika menua bukit enggau chara ti berurun.

“Tu mega chara dikena kitai mantu nyungkak ekonomi peranak dia nengah aktiviti rekreasyen enggau dagang temuai,” ku iya.

Suara Sarawak