KUCHING: Bup Statistik Subnasional nyadi malin beguna bendar ngagai semua Adun ba menua tu ngelanggur pemansang ti setipak ba sitak sida.

Speaker Dun Sarawak, Tan Sri Datuk Amar Mohamad Asfia Awang Nasar madah, nya deka mantu sida nusun strategi enggau chara gawa dikena mantu rayat nengah penerang dalam bup nya.

“Penerang enggau statistik nya datai ari rayat lalu deka pulai baru ngagai rayat ngambi dikena genap Adun nambah pemansang enggau muntang ngereja pengawa,” ku iya.

Asfia mansutka jaku nya lebuh Pengawa Nyuaka Bup Statistik Subnasional Dun ngagai bala Adun Sarawak di Bangunan Dun ditu tadi.

Iya madah baru, pangku pengawa Adun beguna amat kelebih agi mantu Kaban Parlimen ba tetiap sitak maya pengawa bepilih besai ti deka diatur enda lama agi.

“Statistik tu nadai bechiping lalu enda bepilih bulu ngagai sebarang parti dalam menua.

“Bepanggai ngagai Adun nya empu ngena manah penerang ti bisi dalam bup tu,” terang iya.

Sama datai Sekretari Dun Sarawak, Pele Peter Tinggom sereta bala bukai.