Bup teks ukai kereban politik

KUCHING: Pemesai guna bup teks ungkup pengawa ngajar enggau belajar enda ibuh dipetalat laban guna bup teks nyadi malin dikena nembiak belajar ba sekula tauka ba rumah di menua tu.

Presiden Gerempung Pengajar Sarawak (STU) Adam Prakash Abdullah madah, guna bup teks nyadi kereban bantu ngagai bala nembiak enggau pengajar di Malaysia endang siti pekara ke udah nyata.

“Penemu ke dibantai bala pengajar mega bepelasarka penerang ari bup teks ke digaga raban bekaul,” ku iya maya dirandau kemari.

Nerang silik iya madah abis nadai tiga beguna ba bup teks ba sekula iya nya parit bup teks dalam sistem pelajar nasional ari sukut nempa ulah sida ke nembiak.

“Nyema pekara tu nadai dikemerat nya tentu deka ngemuntanka juluk.

“Kaul entara bup teks enggau atur ngajar enggau belajar enda patut diperati ari sukut pengajar enggau nembiak aja tang patut diperati penuh ngira sistem pelajar,” ku iya.

Adam madah subjek Sejarah endang sebengkah subjek ti nerangka pekara ke amat bekaul enggau pekara ti kala nyadi ba menua tu.

Ku iya, penerang nya patut ngiri penemu patriotisme ba raban nembiak ngambiak ngambika sida terus sayauka menua.

“Penerang ke betul mega deka nyadi malin ngagai semua awakka ngelala sereta meretika raban komunti ti nyaup nempa menua mansang,” ku iya.

Nya alai, Adam madah STU ngarapka raban bekaul berunding enggau ngenataika penerang ti betul nengah bup teks Sejarah ungkup semua renggat ke pemaik semua.

Kenu ku iya, bup teks enda patut nyadi kereban politik tauka digaga dikena nguntungka sekeda raban dikena sida ngenataika sesebengkah juluk ati.

“Aram kitai sama ngajar anak bansa awakka mereti agi pasal pengawa ke udah dikereja raban bujang berani dalam ngetanka menua.

“Tu deka nerenak ulah arap sereta bebasaka pangan diri ba komuniti di menua tu nadai ngira bansa,” ku iya.

Iya mansutka penemu nya nimbal penerang dipansutka ex-Menteri Pelajar Datuk Seri Mahdzir Khalid, iya nya bup teks Sejarah pom empat patut dipansik baru lalu dibai ngagai kabinet laban bisi ngundan tiga pekara berat nadai dipasuk dalam bup nya.

Kenu ku iya, tiga pekara nya nyengkaum penyai komunis, raban pengelikun ke udah bebadi nyawa ngelaban komunis sereta pejalai politik Umno ngulihka buah merdeka.

Suara Sarawak