Buriek ke London

KAPIT: Penengkebang fesyen Sarawak nerima Anugerah Pereka Borneo Terbaik 2019 (Penengkebang Borneo Pemadu Nyulut 2019) ba Festival Borneo Entarabansa (IBF) 2019 di St John Church, Hyde Park, London apin lama ke udah.

Peranak asal Kapit, Drothy James, menang ba pekit nya enggau tuju mandangka penyelai enggau pengelebih dikembuan menua Sabah enggau Sarawak tauka dikumbai tanah Borneo.

Indu beumur 37 taun ti tampak agi dikangau enggau nama Mimie James madahka diri endang ngelangkar enggau ngaga gaya pekayan ungkup model menua tu sereta kena sida bepekit.

Taja pia ku Mimie, iya nadai kala berani enggau orang bepekit sebedau tu dataika siku bakih meri peransang ngagai iya, mandangka penyelai siti ari pesaka adap Batang Rajang, buriek, ngagai mata dunya.

“Bakih aku tu meri buah runding ti nyelai sereta jarang dipeda ti ngasuh ati aku gagit endar deka nguji enggau orang mantaika asil keranjai diri empu lalu rejister ba pekit serak tu.

BURIEK DI KOTA LONDON… Keranjai Mimie matak perati dunya.

“Terubah endang bisi penangi sereta irau laban nadai kala enggau orang bepekit, tu nyau datai ba tikas entarabansa tang ari jaku peransang enggau umbuk iya, aku mega nyendiaka diri, alah menang kira dudi,” ku Mimie lebuh dirandau Suara Sarawak.

Mimie mega bisi amat pengandal pekayan dilagu ngena kerubung tekuyung buriek ulih matak perati bala akim ari penyelai enggau pemanah buah pengudah iya dilekat enggau disangking ba pekayan indu enggau lelaki.

Ari nya ku Mimie, iya ngasaika diri temegah ulih mantaika seni buriek tu ngagai menua tasik sereta ulih ngidupka baru seni buriek ti nyauka punas ba menua tu.

“Kandang setaun dua tu buriek nyau majak dikelala mensia mayuh, ari pengeransing, pengepuh enggau pengeran kami ti ngemeranka seni pengelandik jari.

“Enti sebedau tu, jarang endar kitai meda orang bekenaka kain buriek, tang diatu, nyauka genap pengerami semua orang gagit mantaika penyelai buah buriek sida nadai ngira indu enggau lelaki, bela enggai alah ari pangan diri.

NYULUT… Mimie disempulang pemenang kategori bukai mantaika trofi diterima sida.

“Tu ngasuh aku temegah amat meda komuniti kitai nemu pemesai reti pesaka asal tu sereta bela nyukung pengawa kami penengkebang fesyen buriek,” ku iya seraya tuchum manis.

Ngelansa pasal pekit nya, bepuluh penyereta datai ari bala penengkebang Sabah enggau Sarawak ke alai Mimie James mujur ngalahka pemekit bukai ba renggat semi-final diatur ba KLCC dalam bulan June taun tu tadi.

Bala pemekit ti udah dipilih tama renggat kepenudi diatur ba Hyde Park, London kena 28 November tu tadi mega dipelanja penuh IBF.

Ku Mimie, iya mantaika langkar pekayan ngena buah (motif) enggau chura ari etnik asal enggau daya idup etnik Sarawak ke alai kerubung buriek ditusuk nunda langkar ti manding sereta setipak enggau gaya pekayan kemaya hari.

“Aku milih kontemporari moden Buriek, iya nya tibak penemu diambi ari ngepan Iban Batang Rajang, dirasuk sida ti bekereja.

“Gaya pekayan tu enda kelalu berat dikena, sedang iya dipeda mata sereta manding dikena sida ti gawa ba opis,” ku Mimie nerang.

Gaya langkar Buriek kontemporari moden ngena kerubung tekuyung buriek ti dijait atas kain nunda buah (motif) Borneo ti dipeda gaya gari ekslusif.

Mimie meri nama asil tengkebang iya nya Keranjai Mimie lalu udah mujur diterima komuniti Sarawak tu empu ke alai kenyau ari bulan June nyentuk diatu, urung 100 lambar udah dijual.

Diatu iya ngepunka kelas ungkup sida ti rinduka seni nya ari London ke alai renggat keterubah Jelajah Sarawak mujur dipejalai sereta nyapai juluk.

Udah tu, Mimie deka ngatur pejalai renggat kedua enggau tuju ngenegapka raban indu ngena pengelandik enggau penau kelimpah nerenak ulah angkunka daya idup Borneo.

Berebak enggau nya ku Mimie, iya rindu bekunsika penemu pasal peluang dagang kelebih agi ngagai raban indu ti gawa ngintu ruang bilik, indai tunggal enggau bala nembiak ti udah nembuka pelajar sida nyengkaum nempa raban pengemeran asil pengelandik jari baru.

“Besai amat juluk ati aku deka meda mayuh agi penengkebang fesyen baru enggau tibak penemu ti nyelai dikena ngangkatka mayuh agi pesaka seni menua tu.

”Kelimpah ulih nyungkak ekonomi ba ruang bilik diri, ngansah penau, penajam runding enggau pemintar nengkebang nunda buah (motif) enggau chura asal, kitai mega ulih nyerungkai peluang dagang besai agi, rembus ke makit entarabansa, mekit tengkebang bansa bukai di dunya tu,” ku Mimie nyimpul randau.