CelO mesti lurus, ulih dipechaya – Talib

KUCHING: Bisi 94 iku Pemesai Integriti Bertauliah (CeIO) ari mayuh bengkah renggat baka pemesai enggau menijar dichiri taun tu.

Menteri ba Opis Kepala Menteri (Integriti enggau Ombudsman) Datuk Talib Zulphilip madahka ulah lurus enggau ulih dipechaya patut dikembuan semua pengereja pengawa enda ngira sapa.

“Kus CeIO begunaka orang ti lurus, manah ulah sereta berintegriti.

“Kelimpah ari nya, sida mega mesti nitihka atur enggau undang-undang ti ditetapka,” ku iya.

Talib bejaku munyi nya lebuh ditanya pemberita rambau bejadika Licha Negapka CeIO enggau Unit Integriti Nengeri Sarawak di Palan Aum Borneo Kuching (BCCK) ditu, kemari.

Ku iya, raban CeIO tu ulih nyadi raban gawa ba luan sereta raban penyukung nentuka pengawa ejensi sida dipejalai enggau betul.

“Pemesai sesebengkah ejensi ulih sedar nyema pengawa dalam agensi bisi dipejalai enda meruan sereta ngujungka tikas pemanah servis enda tegap.

“Ari nya sida patut negapka pemanah servis sereta ngemanahka chara meri servis ngagai orang bukai,” ku iya.

Iya meri chunto sentang pengawa suah lubah nganjung akaun ari sesebengkah ejensi.

“Taja ejensi ti laun nganjung akaun nya enda mayuh tang Perintah Sarawak udah ngaga pemutus madahka akaun enda tau dianjung laun sereta mesti dianjung nitihka timpuh ti ditetapka.

“Ketegal akaun lubah dianjung, mayuh cherita nyelai deka nyadi baka akaun enda kemas, bisi pekara dilalai, nipu nyentukka perintah ngambi pemutus semua akaun tu mesti dianjung tumu.

“Nya nyadi tanggungpengawa CeIO matau sereta nentuka ejensi iya nitihka atur tu,” ku iya.

Talib mega nandu, raban media mega tau mantu Perintah Sarawak negapka pemanah servis menua nyema bisi ninga penanggul.

Suara Sarawak