Centexs Mukah deka disikap menyana

KUCHING: Palan belajar betanam betupi pintar di Mukah tauka Kampus Centexs Mukah dipelaba tembu dalam kandang 18 bulan ti deka datai.

Kepala Menteri Datuk Patinggi Abang Johari Tun Openg madahka palan belajar betanam betupi pintar di Mukah tu diambi Palan Pematih Pemansang Nembiak (Centexs) ari Palan Pemansang Penau Sarawak (PPKS) laban perengka teknologi di Centexs engkeman agi.

“Diatu palan nya benung digaga sereta disikap enggau perengkaguna ti meruan endur belajar.

“Pengudah palan (kampus) tu disikap enggau manah baru kitai muka palan tu endur nembiak belajarka chara betanam betupi pintar,” ku iya.

Abang Johari bejaku munyi lebuh ditanya pemberita ba Program Centexs-SMA Safari 2019 (Petra Jaya) ditu, kemari.

NGABAS…Kepala Menteri Datuk Patinggi Abang Johari Tun Openg (kanan) ngabas palan pemandang nyerumba Program CENTEXS – SMA Safari 2019 di Penview Convention Centre (PCC), Jalai Bako, Kuching. -Gambar NADIM BOKHARI

Ba program nya mega dia iya lalu bejadika sebengkah aplikasyen ti dikumbai ‘Sara X’.

“Sara X tu sebaka enggau aplikasyen ‘Grab’ enggau ‘Uber’ entara pemekal enggau penguna.

“Ambika chunto enti nuan deka makai mi jawa nuan ulih ngena applikasyen tu ngudar mi jawa lalu orang ti ngaga mi jawa deka nganjung ngagai nuan tekala nya,” ku iya nerang.

Sara X mantaika mayuh macham servis bukai baka nuchi kerita, ngemas rumah, nebas babas enggau ke bukai.

Sama bisi datai kemari Menteri Muda ba Opis Kepala Menteri Undang-undang, Kaul Sarawak enggau Perintah Besai sereta Matau Projek Sharifah Hasidah Sayeed Aman Ghazali, Menteri Muda Bekal Ai Datuk Dr Abdul Rahman Junaidi, Chairman Centexs Tan Sri Morshidi Abdul Ghani enggau ke bukai.