TATAU: Pengawa ngemanahka jematan ba jalai Sungai Anak ditu deka meri pemaik ngagai 600 iku peranak ari empat buah rumah panjai ke sama betengahka jalai nya.
Berundingka pekara pengelantang enggau pengelikun, dia chalun ari Parti Keadilan Rakyat (PKR), Joshua Jabeng, sanggup mansutka belanja ari kuchik iya empu ngemujurka pengawa.
Ku iya, projek beungkus RM10,000 nya kelai pengeran enggau pengeransing iya mai kandang menua nya mansang seikas menua maju ke bukai.
“Aku nemu, menua tu agi tubah begunaka pemansang kelebih agi ari sukut infrastruktur pemun lalu pekara tu ti diselinting aku enti sema diberi kita peluang nyadi pengari ila.
“Arapka bala kita ulih muka runding lalu nerima pengari baru ba sitak Kakus tu, milih pengari ti ulih mai sada kita ngagai renggat kabinet ngambi kitai badu tinggal pemansang,” ku iya.
Joshua Jabeng nibarka jaku nya lebuh Bejadika Pengawa Nyeleti Jematan Jalai Sungai Anak ti diatur ba Rumah Anggut, Sungai Anak ditu, kemari.
Iya dikelala siku ari orang ti ransing negika hak raban bansa Dayak kelebih agi ngaul isu tanah Adat Bansa Asal (NCR) kelimpah pekara ti semak enggau Orang Asal di menua tu.
