ARTIKEL

CHARA LAMA… Louis keran ngetan seni kelingai lama bansa Iban.

Chara bekelingai lama patut ditan

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Taja seni kelingai mayuh udah berubah ngagai chura kotemporari, nembiak rebak baru patut nemu asal pengawa bekelingai ke lama ngambika ulih ditusi ngagai nembiak rebak baru jemah ila.

Siku artis kelingai ti agi ngetanka chara bekelingai lama, Louis Franklin, 34 madahka bekau ari ubah dunya ti majak moden sereta mansang, chara ngadu kelingai lama mayuh udah diganti enggau kereban baru ti moden sereta jampat.

Ku iya, pekara tu ketegal seni kelingai udah digaga nyadi siti ari pengawa dagang tauka nyadi komersil pengemeran seni nya.

Louis asal ari Ulu Engkari Lubok Antu madah, iya berengkah ngaul diri ba dunya bekelingai kenyau ari taun 2015 lalu semina ngetanka ukir enggau chura kelingai asal bansa Iban aja.

“Aku nyentuk diatu agi ngaga kelingai asal iya nya betatuk, aku agi ngena chara ngena kayu tatuk ti dikena orang tuai kelia.

“Bungai kelingai aku mega semina ukir Iban tulin ti diambi enggau dipelajar ari niang aki sereta apai,” ku iya lebuh dirandau Suara Sarawak, kemari.

CHARA ASAL

Ku iya, taja diatu nembiak rindu ke chara moden lebuh ngaga kelingai, iya enggai ninggalka chara lama laban keran deka nanka chara asal orang bekelingai kelia.

“Diatu orang bisi udah ngaga mesin kelingai ti jauh lebih jampat sereta nyamai agi dikena ari ngena kayu tatuk.

“Tang nyema chara lama tu enda dikena agi, nya deka lenyau sereta pupus,” ku iya.

Ku Louis, orang tuai kelia ngadu kelingai ngena jerumat ti diambi ari duri limau.

“Jerumat duri limau nya ditanchang ngena ubung Pua Kumbu ba kayu penatuk.

“Udah nya, sida tuai deka nyumai arang kayu ba siti tin ungkup ngulihka ai chelum ti deka nyadi chura bungai kelingai,” ku iya.

AI PEMANIS

Iya madah, udah nya ai arang deka digirau sebedau diiri dalam siti buluh enggau ‘ai pemanis’.

“Udah ai arang nya disimpan dalam buluh sida deka nitiska sebengkah ‘ai pemanis’ dalam buluh nya awakka chura chelum tu ila tan lama ba tubuh.

“Diatu ‘ai pemanis’ nya udah nadai agi, tang ku sida ke tuai suba ai chura kelingai tu chukup bau, bau tai,” ku iya.

KEREBAN DIKENA… Louis mantaika kereban ti dikena iya ngaga kelingai.

Iya nandu, udah ai kelingai nya nyadi, sida deka engkah ai nya dalam siti tachu sebedau dikena.

“Kelia, lebuh orang deka ngaga kelingai sida meseti bisi miring besampi ngambika nadai nyadi apa nama ngagai orang ti natuk enggau orang ti ditatuk.

“Tang diatu pengawa miring mayuh udah enda dikena agi baka nya mega enggau jerumat sereta ai arang.

“Aku ngarapka penemu baka tu enda lenyau sereta terus ditusi ngagai nembiak bukai, awakka serak menua ulih nemu chara orang kelia ngaga kelingai,” ku iya.

BERITA LAIN

BERITA TERBARU