KUCHING: Perintah Sarawak benung chakah merambu mutar ubah klimet enggau ngalih ngagai kuasa baru.

Sapit Menteri Kuasa enggau Pemeruan Rampa Menua, Dr Hazland Abang Hipni madah, Perintah Sarawak naka ulih neritka sekeda polisi ungkup pengawa nya.

“Tu nyengkaum Polisi Ekonomi Gadung enggau Polisi Ngalih Kuasa Baru Sarawak sereta berundingka inisiatif mutar karbon enggau bepelasar teknologi.

“Kitai meseti ingat, metana tauka gas rumah gadung (GHG) bisi timpuh ke pandak agi dibanding karbon dioksida.

“Taja metana bisi pengulih besai nambahka pengangat bumi tang karbon dioksida deka lama agi ba atmosfera enti nadai atur dikena ngurang pengawa nya,” terang iya.

Hazland ti ngarika Sarawak mansutka jaku nya lebuh ngulu Randau Minyak Sawit Meruan Antarabansa (ISPOF) berambaika jaku “Meransang Dagang Meruan enggau Bekunsi ba Asia Pasifik” diatur Institut Strategik KSI ungkup Asia Pasifik di London.

Randau nya mega digulu Sapit Menteri Besai ke mega Menteri Pengawa Bekebun enggau Komoditi, Datuk Seri Fadillah Yusof mega bisi bejaku bekaul ‘Dagang Meruan enggau Atur Dagang ba Jeman Dunya Baru’.