KUCHING: Perintah Sarawak udah bisi perambu deka ngidupka baru industri dagang temuai di menua tu, ke alai pekara nya deka dipadahka pengudah Gempung Parti Sarawak (GPS) bulih mandat nyadi perintah dalam Pengawa Bepilih Besai Nengeri (PRN-12).

Kepala Menteri Datuk Patinggi Tan Sri Abang Johari Tun Openg madahka iya udah bisi siti chara baka ni ngidupka industri dagang temuai di menua tu ke udah tebunsa ketegal pengerekai Covid-19.

“Kitai deka bejalaika pengawa tu tang nengah chara aku agi bisi kuasa tauka mandat pulai ngagai GPS baru.

“Nyema mandat diberi ngaga GPS baru, kami bisi chara deka ngidupka industri dagang temuai kitai,” ku iya.

Abang Johari bejaku munyi nya rambau Program Bejadika Waterfront Niah ditu, kemari.

Ku iya, perambu tu udah bisi dalam polisi Strategi Pasca Covid-19 (2030) ke alai sebagi ari perambu nya nyengkaum Bagi Menua Subis enggau palan pemansang bukai.

Chairman GPS nya madahka, perintah ngembuan langgur pemansang ba timpuh panjai dalam sukut pemansang ekonomi.

“Palan tu ngembuan sejarah ari Gua Niah, lalu gua nya siti ari penyelai ti balat narit ati menua luar.

“Nengah sukut sejarah, nama ti ditemu ba dalam Gua Niah deka nyadi palan penemu sejarah mensia.
“Aku kala bedarat lebuh udah nyadi Kepala Menteri ngagai Gua Niah, lebuh aku tama aku meda kitai mesti ngemanah gua tu,” ku iya.

Ku iya, nya ngujungka Gua Niah nerima projek ngemanah perengkaguna pemun ngambika enda bepanggai ngagai chara lama agi.

“Nyema bejalai kaki endang mar kin, kitai nyendiaka jalai tama nyengkaum ngena ‘buggy’ kerita ti ngena bateri tama ke dalam gua.

“Lebuh orang kitu udah tentu sida deka bebelanja, kita ulih ngaga rumah ngenduh (homestay) ke alai pekara tu deka meri penatai pemisi tambah ngagai peranak ditu.

“Nya alai kitai ngemanahka waterfront ditu, endur muka mayuh agi ekosistem ti manah baka dagang temuai enggau betanam betupi awakka ekonomi kita ngerembai,” ku iya.