Chara politik Malaysia patut berubah

KUCHING: Chara politik ba menua tu patut berubah ngambika servis ke lebih manah ulih datai ba rayat.

Adun Jemoreng, Datuk Dr Juanda Jaya madah, pengudah Pengawa Bepilih Besai ke-14 (PRU-14) chara politik menua bisi berubah laban rayat pintar agi berati.

Ku iya, udah datai maya iya Malaysia nyapai penuai runding ba politik laban rayat pintar ngaga pemutus.

Ku iya, diatu penuai runding politik menua bedau tejapai laban pendiau politik agi diiring raban tokoh politik ke lama.

“Dini mua orang baru? Orang baru bedau ngayanka diri laban agi nitihka pendiau politik lama, chara politik ke agi pabu.

“Sida tu enti dipejah lalu ringat tang politik ke tuai runding tu kebendar lebuh dipejah kitai patut ngaku pengilap diri, lebuh kitai dipuji, kitai patut minta penemu ke lebih manah,” ujar Juanda maya dikangau nyadi pengari program ‘Kopi Panas, Landskap Baharu Politik Sarawak’ dibantaika terus nengah laman Facebook Borneo Channel kena Hari Enam tu tadi.

Ngelansa pasal penau raban orang biak diangkat nyadi ketuai, Juanda madah iya setuju enggau orang biak ke bisi peneleba lalu landik diangkat nyadi ketuai.

Ku Juanda, ‘darah baru’ tu deka bebendar agi gawa laban ngetanka penuduk diri ba sitak ke dipegai.

Iya madah, ba sesebengkah atur merintah, patut bisi champur raban ke bepeneleba enggau raban orang ke biak.

“Atur merintah tu patut datai ari mayuh renggat enggau penau. Nyadi asil ari sida tu gawa begulai deka nentuka pemansang enggau penyulut menua,” ku iya.

Dr Juanda (tengah) benung berandauka pekara politik Sarawak begulai enggau Dato Wan Abdillah Edruce sereta pematak randau dikemujurka Rudy Affendy Khalik (kanan).

Suara Sarawak