Cherpan Jaku Iban Integriti agi nadai penyereta

KUCHING: Barang sapa bisi penau ngarang dalam jaku Iban diperansang nyereta Pekit Ngarang Cherpan Jaku Iban Integriti 2019.

Sekretari Kereja Serakup Pengarang Sarawak, Muhammad Yusuf madah, naka diatu piak sida apin nerima sebarang penyereta ba kategori Cherpan Jaku Iban.

“Kami nerima mayuh penyereta ba kategori ngarang esei jaku Melayu enggau English, leka main enggau cherpan jaku Melayu tang apin nerima sebarang penyereta ba kategori Cherpan Jaku Iban.

“Kami ngelaluka kerejasama ari semua piak nyengkaum gempung ukai dikuasa perintah (NGO) enggau bala pengajar sekula matak penyereta ari bala nembiak sekula,” ku iya.

Iya mansutka jaku tu lebuh dirandau pengudah nyuaka pemeri pengasih Serakup Pengarang Sarawak ngagai lima ruang bilik dipilih di Kuching ditu.

Kenu ku iya, perais khas disedia ungkup sekula ti nganjung penyereta pemadu mayuh seraya setipikit penyereta deka diberi ngagai genap sida.

Muhammad nerang, pekit nerima semua penyereta ari peranak Sarawak beumur tujuh taun enggau tuai agi.

Penerang enggau tanya silik tau telefon nuju Zaid Zaidel Jamil ba lumur 012-8888759 lalu hari bulan kepenudi nganjung penyereta kena 30 November 2019.

Pekit Ngarang Integriti 2019 keterubah diatur Unit Integriti enggau Ombudsman Nengeri Sarawak (UNION) enggau kerejasama Serakup Pengarang Sarawak.

Suara Sarawak