China meri 150, 000 sengkabung mua ungkup terabai komuniti

KUCHING: Sepenyampau 150,000 sengkabung mua udah disua ngagai raban terabai komuniti ba Sarawak ti bebendar gawa nagang pengerekai igi penyakit Covid-19 ba menua tu.

Sengkabung mua nya ari Konsulat Jeneral China di Kuching enggau disua ngagai Perintah Sarawak ngambi disadung ngagai raban terabai komuniti di menua tu.

Penyanding Penemu Komiti Penyangga Penusah Nengeri Sarawak (JPBNS), Datuk Seri Dr Sim Kui Hian meri terima kasih ngagai China dikena nyaup menua tu.

“Terima kasih ngagai Konsulat Jeneral republic Rakyat China ba Sarawak laban udah nyuaka 150,000 sengkabung mua ti diberi ngagai raban terabai komuniti.

“Tu meransang Sarawak bebendar agi nagang pengerekai igi penyakit Covid-19,” ku Kui Hian ba sebengkah penerang di Facebook iya, ditu tadi.

Nambahka nya ku iya, taun nyin kemari Perintah Sarawak, komuniti China ba menua tu enggau Parti Sa’ati Rayat Sarawak (SUPP) mega udah nyuaka sengkabung mua ngagai China kelai penyiru lebuh China nagang pengerekai Covid-19.

“Kami enda nyangka sida jampat malas pemanah nengah bemacham chara baka ke diatu,” ku Kui Hian ke mega Menteri Kaunsil Kandang Menua enggau Pengawa Berumah.

Kena 18 March tu tadi, Sapit Kepala Menteri ti mega Chairman JPBNS, Datuk Amar Douglas Uggah Embas enggau Dr Sim udah nerima sengkabung mua ba Kompleks Dun Lama.

Suara Sarawak