KUCHING: Kaban Parlimen ari Sabah enggau Sarawak mesti dichiri nyadi Sapit Menteri Besai dikena meri basa nyaup numbuhka perintah baru.

Sapit Kepala Menteri, Tan Sri James Jemut Masing madah, pengawa tu nentuka penegap politik.

“Enti ulih, tau nyiri dua iku Sapit Menteri Besai ke alai siku ari parti di Semenanjung Malaysia lalu siku agi ari Gempung Parti Sarawak (GPS).

“Enti pekara tu amat nyadi, tu meh keterubah iya dalam sejarah ba Malaysia pangku pengawa Sapit Menteri Besai diberi ngagai Sabah enggau Sarawak,” ku iya nerang, ditu kemari.

Nambahka nya, pemutus nya nunjukka jasa kededua nengeri tu diaku Malaysia.

“Sapa ke dipilih nya bepanggai ngagai tuai GPS nya empu,” ku Masing madah.

Dulu ari nya, iya madahka pengawa milih Sapit Menteri Besai ari Kaban Parlimen GPS endang pekara ke patut.

“Tu ngayanka jasa GPS ngagai Perintah Besai diaku.

“Ba pekara politik, sida diaku baka meri penuduk ngagai kaban parti ke udah besaup negapka perintah tauka menua,” ku iya.