Chokelit Borco besemekih ba makit entarabansa

LUBOK ANTU: Siku pedagang chokelit ari menua Lubok Antu, Regina Lambor keran dekaka produk chokelit ngena chap dagang Borco rembus ngagai makit entarabansa.
“Diatu, aku benung merambu ngangkatka produk chokelit tu ngagai renggat entarabansa nengah pelasar Alibaba enggau TradeIndia,” ku iya madahka perambu ba taun 2021 tu.
“Kelimpah ngangkatka produk chokelit tu ngagai tikas entarabansa, tu mega sebagi ari chara aku mandangka budaya enggau pengeraja di Sarawak tu.
“Kebuah pia laban nama chokelit enggau utai dikena ngaga chokelit tu endang ngena pemakai asal kitai di Borneo,” terang Regina sentang bansa pemakai ti digulai dalam chokelit tu.
Ke penerang semua, chap dagang Borco tu datai ari leka jaku Borneo Cocoa lalu dipandak ngena nama Borco tu tadi.

MILIH KEDIRI… Entara bansa chokelit ke bisi dijual Regina ngena chap dagang Borco.

CHOKELIT BORNEO
“Aku teulihka runding deka ngepunka dagang produk chokelit Borco pengudah beratika pengulih Koko Sarawak nya entara koko pemadu manah di dunya.
“Enti sema kitai ulih mansut sereta eksport igi koko pemadu manah baka nya, nama kebuah kitai enda ulih mansutka produk chokelit tikas entarabansa?,” terang Regina.
Pia mega ku peranak Lubok Antu tu, iya mega teulihka runding deka ngeluarka produk chokelit tu pengudah meda siku nembiak lelaki beumur urung empat enggau lima taun benung ngipung milo semun.
Regina mega madahka iya berasai sinu enggau kasih meda nembiak lelaki nya lebuh nemuai ngagai sebengkah endur.
“Berasai sinu aku meda ulah nembiak ke benung ngipung milo semun nya, dia aku keran deka nempa siti produk chokelit ari igi koko Borneo.
“Nya kebuah, aku nengkebang variasyen chokelit ngena pemakai asal ti dikerindu pupu bansa di Tanah Borneo tu,” kuiya.
Nambahka nya, iya mega madahka Tanah Borneo tu ngembuan mayuh pemansut ke bisi pengulih dikemansang.
Beduduk ari nya, Regina berengkah ngeluarka lapan leman chokelit ngena chap dagang Borco.
PELASAR DIGITAL
PRODUK MENUA… Chokelit Empelajo digaga ari buah empit.

Ku iya, pelasar digital kemaya hari udah ngemuntangka pengawa ngelakuka produk chokelit tu ngagai makit menua enggau makit entarabansa.
“Aku berasai chukup gaga laban pelasar dagang digital udah ngemuntangka semua pengawa kelebih agi produk chokelit tu muntang dijual.
“Meri besai terima kasih ngagai Kepala Menteri kitai laban udah nyukung sereta keran dekaka Sarawak maju nengah pelasar digital tu.
Iya mega madahka Kepala Menteri Datuk Patinggi Abang Johari Tun Openg udah ngaga pemutus ti engkeman ngena pelasar digital nipakka pemansang dunya.
Ku Regina, pelasar digital udah ngangkatka produk menua ngagai tikas ke tinggi agi seikas enggau produk tebilang ke bukai.
“Ambika banding, dagang produk chokelit aku diatu dijual nengah pelasar online baka Lazada enggau Shopee.
“Aku mega bisi nyual chokelit tu nengah agent, ba palan besai bebelika barang, ekspo enggau kedai,” terang Regina.
“Kelimpah ngangkatka dagang chokelit, aku keran mantu bala bukai lebuh aku bisi nyendiaka peluang sida nyadi agent kelebih agi raban indu ke deka ngiga anak belanja ungkup sida sebilik,” terang Regina.
KE KENANG NEMUAI… Bala penguna tau meli chokelit tu nyadi tepa.

PENGERAJA TANAH BORNEO
Regina madahka kitai ba Borneo chukup betuah laban ngembuan mayuh pemansut ke tau dikemansang ukai semina ba makit menua tu tang ulih rembus ngagai makit dunya.
“Lapan bansa chokelit tu endang ngena pemansut ba Borneo baka madu kelulut, terung Dayak, buah empit, beras angi ari Lingga, gula apong enggau garam ari Ba’ Kelalan.
“Entara chokelit dijual aku nya baka chokelit madu kelulut, chokelit Terung Dayak, chokelit empelajau tauka buah empit enggau chokelit lada pudina digaga ari lada chelum enggau lia chelum.
“Pia mega, Rajah White Chocolate digaga ari berau angi Lingga, chokelit susu koko digaga ari gula apong enggau garam Ba’ Kalalan, local prince chocolate ari berau chelum Bario enggau Chokelit Princess Z’yca ke digaga ari empikau.
“Nyangka jarang kitai ninga chokelit digaga ari buah empit enggau empikau tang aku berasai gaga laban ulih ngasilka chokelit ke jarang didinga kitai sebedau tu.
“Nadai utai enda ulih dijapai enti kitai keran sereta fokus ngangkatka dagang bakatu,” ku Regina meransang bala pedagang bukai di menua tu.
Pia mega, Regina ransing ngerembaika agi dagang chokelit tu laban keran deka meri peluang ngagai peranak menua tu ngasaika chokelit tikas entarabansa enggau rega ke ulih ditangkup semua.
SUKUNG ARI DIRI SEBILIK
Regina madahka sida sebilik ke meransang dataika iya mujur baka ke diatu kelebih agi laki iya, bala anak, apai indai enggau bala menyadi iya.
“Aku bendar meransang ati diri dalam dunya dagang tu ari peransang bala bakih sereta ejensi perintah ke udah suah nyukung projek tu.
“Tu nyengkaum MARA Nengeri Sarawak, Opis Betanam Betupi Nengeri Sarawak, SEDC, Gerempung Orang Bumai Sitak Engkilili/Lubok Antu, UMK enggau ke bukai.
“Sida tu ukai semina meri pengering aja tang mega udah nyaup ari sukut puku ngepunka dagang sereta suah meri sanding penemu.
Terang Regina, sanding penemu ari ejensi perintah tu besai reti ngambi dagang iya majak laku sebaka enggau dagang orang bukai.
Regina madahka iya ngepunka dagang produk chokelit tu ari taun 2017.
“Keterubah suba, aku semina ngaga gamal chokelit baka keris, rumah enggau replika bukai ti ulih nyadika tepa ba sebengkah penerami.
“Udah nya, aku berengkah ngaga chokelit pralin enggau bar baka ke diatu ari taun 2018.
“Aku mutus ati ngepunka pengawa ngaga chokelit pralin enggau bar pengudah siku Pegawai Mara tama ngagai kedai lalu madahka chokelit ke benung diempa iya lebuh nya bisi pengulih.
“Pengudah mendingka sanding penemu ari pegawai nya dalam bulan March 2018, aku keran dekaka dagang produk chokelit tu majak dikelala ukai semina ba makit menua tang rembus ngagai makit entarabansa,” ku Regina nerang.
Berindik ari nya, Regina madahka iya berengkah ngagai Pengawa mansik enggau pemansang (R&D) lalu ngeluarka produk chokelit Borco dalam bulan June 2018.
NERIMA MAYUH PEMINTA
Naka tu, bisi lapan bansa chokelit udah dijual ngena chap dagang Borco lalu nerima mayuh peminta kelebih agi Chokelit Madu Kelulut, Chokelit Terung Asam, Chokelit RajahWhite, Chokelit Local Print enggau Chokelit susu koko.
“Chokelit nya empu diambi ari igi koko Borneo iya nya diinjin ari Palan Nginjin Kaunsil Koko Kota Samarahan sereta Palan Nginjin Kaunsil Koko, Kota Kinabalu Sabah.
“Madu kelulut nya diambi ari Sya Rina Brand, Pengeluar Madu Kelulut ba Lubok Antu, Terung Asam ari KUN Produk Serikat RFM Miri, Lada hitam ari Pakan enggau Halia Chelum ari Kalimantan Tengah Indonesia.
“Buah Empit ari Lamanak, Lachau enggau Serian, empikau rian ari Ulu Batang Ai, berau angi ari Lingga, Berau Bario ari Bake’kalan, garam bukit ari Lawas sereta Gula Apong ari Kabong enggau Spaoh,” terang Regina.
Pengawa ngelakuka chokelit ngagai makit menua entara pemar ditapi Regina.
Kebuah pia laban diatu mayuh chokelit udah dijual ba makit lalu baka ni nentuka chokelit Borco tu dikerindu mensia mayuh.
“Chokelit tu enda tau enda diengkah ba endur ke chelap tauka kurang ari 24’c ngambi asal sereta struktur iya enda berubah.
“Bala agent chokelit mesti naruh chokelit tu enggau naka pengelikun sebedau datai ba jari bala penguna.
“Borco pansut mai asai Borneo, rega ke ulih dibeli bala penguna enggau nama etnik Borneo,” terang Regina silik agi.
Naka tu, Regina kala nempa kaul kerejasama enggau ejensi MARA nyual produk ba AEONMALL, Gerempung Orang Bumai Sitak Kuching, serikat kediri baka H & S, Sya Rinna Brand enggau Abella S’cent.
Barang sapa ke deka ngudar chokelit nya tau terus Google D’ MUMMY’S RECIPE, Lazada, Shopee, agent ba selampur Sarawak enggau Semenanjung Malaysia tauka ngelawa kedai D’ Mummy’s Recipe.
PRODUK LAKU
Berebak enggau nya, Regina madahka rega siti chokelit tu nitihka gram lalu chokelit Borco tu bisi dijual dalam pralin enggau bar ke alai bar bisi tiga bansa baka 45g segi empat tepat (RM6.50), 45 gram stik bar (RM5.00) enggau 25g mini bar (RM2.00).
“Empat stik bar ba dalam siti kutak berega RM16.00 sekotak. Pralin dijual 12 iti sekutak berega RM18.00.
“Tang rega ba makit enda sebaka enggau rega agent. Kebuah pia laban rega chokelit dijual agent mayuh ngenataika untung.
“Naka tu, agent kami pemadu mayuh nyual 800 ngagai 1,000 bar dalam timpuh dua minggu lalu bulih untung entara RM2,500 ngagai RM3,000.
“Pengawa ngaga chokelit tu enda lama aja, dalam sehari kami ulih mansutka ari 30 ngagai 50kg lalu ulih tan setaun.
“Pengawa ngaga chokelit tu berengkah ari pengawa manduk koko nya dataika lemi udah nya dituang ngagai chuan lalu dilak dalam peti ais (chiller),” ku iya nerang bekaul pengawa ngaga chokelit nya.
Nambahka nya, chokelit udah meku nya dituang ngagai dulang lalu ditungkus ngena aluminium foil sereta dibalut ngena sticker.
Regina madahka chokelit tu tan dataika setaun bepanggai ngagai chara nungkus sereta chara nyimpan iya.
Kelimpah ari nya, Regina dekaka bala penguna ulih makai chokelit ke bekualiti enggau rega ke ulih ditangkup sereta ulih ngasaika penulin chokelit asal digaga ari koko tu.

Suara Sarawak