Chuan turu menua Norway deka ditunda

KUCHING: Kepala Menteri Datuk Patinggi Abang Johari Tun Openg nyukung resolusyen numbuhka Turu Pengayu Sarawak ti dibantaika Parti Sa’ati Rakyat Sarawak (SUPP), kemari.

Ku Chairman Gempung Parti Sarawak (GPS) nya, resolusyen tu deka nunda chuan menua Norway laban sama bisi ngembuan penatai pemisi ti nyau deka sebaka.

“Menua kitai enggai nyadi nunda menua Singapura laban sida ngembuan penatai ekonomi ti bebida, nya alai kitai deka nunda menua Norway.

“Ngarapka ba taun 2024 tauka 2025 penatai pemisi menua deka nambah lalu negapka penatai ekonomi menua,” ku iya.

Iya bejaku munyi nya lebuh bejadika Aum Besai Khas SUPP di Indu Opis SUPP ditu, kemari.

Abang Johari madahka iya pechaya nengah kerejasama entara parti komponen semua pekara ti dilanggur ulih meri timbal ti manah.

“Nya kebuah kitai ngembuan juluk ti besai ngagai pekara ti bekaul enggau ekonomi, pekara rama sereta rampa menua ti stabil.

“Sentang pekara bukai kita anti aja nama ti deka nyadi entara bulan tu enggau bulan baru sentang pekara minyak enggau gis ti deka mai ekonomi menua kitai ngerembai,” ku iya.

Dulu ari nya, Presiden SUPP Datuk Sri Prof Sim Kui Hian mantaika enam resolusyen iya nya nyukung penuh Presiden GPS ti disandang Abang Johari nguluka sida ba Pengawa Beplilih Besai Nengeri ke-12 (PRN12) sereta nyukung Abang Johari nyadi Kepala Menteri Sarawak.

“Kelimpah ari nya, kami minta Perintah Sarawak nguna RM3.18 billion ti diulihka ari chukai SST 2019 ungkup mayar RM500 ngagai semua rayat Sarawak, numbuhka tabung khas ungkup sumber mensia dikena mantu nembiak rebak baru ngambi latih peneleba, pansik teknologi enggau pemansang dagang sereta numbuhka Tabung Kedaulatan Sarawak ungkup nentuka nembiak rebak baru ngasaika penyamai ari penguntung sumber minyak enggau gis menua.

“Nangkan ke nya, kami minta Perintah Sarawak ngemandarka palan tanah endur diau enggau komersial ti dipajak ngagai pegai bebas ba Sarawak enda dikenaka bayar tambah,” ku iya.

Nengah resolusyen ti keempat SUPP minta Perintah Sarawak meri vaksin Covid-19 enda bebayar ngagai semua rayat Sarawak lebuh vaksin nya udah bisi ila.

Pia mega, resolusyen ti keenam SUPP minta Perintah Sarawak ngaga pengambis nadai 5,000 unit rumah ulih diempu ngagai raban B40 enggau M40 sereta meri bantu belanja meli rumah keterubah.

Ba resolusyen kepenudi, SUPP minta Perintah Sarawak neruska pengawa ngambi hak Sarawak pulai baru nengah MA63 nyengkaum pekara pengerai enggau pekara pelajar.

Sama bisi datai Sekretari Besai SUPP Sebastian Ting, Mandal Ketuai Parti Bumiputera Bersatu (PBB) pampang Satok Datuk Ibrahim Baki enggau bala bukai.

Suara Sarawak