Chukai minyak enggau gis agi ulih diperunding

KUCHING: Chukai ari asil nyual minyak enggau gis ulih dikurangka enti nya peminta ari Petronas ketegal ari penanggul ekonomi, ku Kepala Menteri Datuk Patinggi Abang Johari Tun Openg.

Taja pia ku iya, Perintah Sarawak mega patut nerima pekara ke sama nengah pengawa ngatur komersial kelebih agi dalam pengawa nambahka ekuiti dalam LNG ti diatu semina 25 peratus aja.

“Reti iya, kami ulih nyereta pengawa ulu enggau ili minyak enggau gis kami lalu ari sukut bekunsi asil, kami mega deka bekunsika formula asil pemansut nya.

“Diatu pekara nya agi diperunding lalu aku ngarapka pekara nya tau bulih pemutus ke manah,” ku iya.

Abang Johari madah munyi nya lebuh pengawa randau Business Engagement Session with Chief Minister of Sarawak enggau rambai jaku Mansang ngagai 2030 di Palan Aum Borneo Kuching (BCCK) ditu, kemari.

Nangkan nya ku iya, Perintah Sarawak semina meri lima peratus chukai ngagai Petronas ari asil nyual minyak enggau gis.

“Penyampau nya enda besai, laban Petronas tau bulih RM40 bilion setaun ari asil minyak enggau gis ke diambi ari Sarawak.
“Aku ulih meri 10 peratus tang laban beratika gaya industri petroleum kitai diatu, nya kebuah aku semina meri lima peratus aja ngagai eksport,” ku iya.

Kelimpah ari nya ku Abang Johari nandu, penyampau asil eksport Petronas nengah LNG RM40 bilion.

“Nadai endar enti semina RM3 bilion diambi ari RM40 bilion nya,” ku iya.

Bela datai ba pengawa nya Sapit Kepala Menteri Tan Sri James Jemut Masing, Menteri Kaunsil Kandang Menua enggau Pengawa Berumah Datuk Prof Sim Kui Hian, sereta Sekretari Perintah Nengeri Sarawak Datuk Jaul Samion.

Suara Sarawak