KUCHING: Kaban Kunsil Nengeri (Adun) Tebedu Dr Simon Sinang Bada deka nentuka sitak dipegai iya enda tinggal pemansang ba adan menua enti sema indu mengeri baru Indonesia di Kalimantan udah dibuka ila

Dr Simon ngarapka peminta Perintah Sarawak dikemendar Perintah Besai dikena melanja pemansang ba adan menua nengah Unit Pengereja Khas Pemansang Adan Menua.

“Kami deka nentuka pelilih tu enda tinggal ba pemansang enti sema Ibu Kota Nusantara, Indonesia udah nyadi nyata ila.

“Kebuah pia laban Tebedu nya pelilih beentara ke menua sepiak lalu udah tentu kitai deka ngasaika empas enti indu mengeri Indonesia pindah ari Jakarta ke Pulau Borneo,” terang iya ngagai Suara Sarawak, apin lama ke udah.

Nambahka nya, Dr Simon ngarapka Kompleks Kastam, Imigresyen, Kuarantin enggau Pengelikun (CIQS) Tebedu ulih dikemanah baka CIQS di Entikong.

“Nama menua nya besai reti. Enti CIQS kitai agi baka ke diatu, reti iya kitai tampak jauh tinggal,” ku iya nyemetak madah.

Pia mega, iya madah, deka berandau enggau semua tuai bansa enggau tuai komuniti ngambi ngenataika penerang ke beguna ngagai rayat ba pelilih nya.

Iya nyemetak madah, rayat ba Tebedu mega mesti ngena manah peluang tu nyikap diri ba semua pekara.

“Aku enggai rayat ba Tebedu semina meda aja tang sida mesti nyikap diri,” terang Dr Simon.

Ba lansa sama, Perintah Sarawak minta Perintah Besai nyendiaka agih belanja ungkup pemansang ba adan menua nengah Unit Pengereja Khas Pemansang Adan Menua.

Pekara tu beduduk ari Perintah Besai udah numbuhka unit merambu pemansang adan menua Sarawak-Kalimantan laban berundingka penumbuh indu mengeri baru Indonesia di Kalimantan.