Clemend temegah nerima sambut positif ari peminat

Ba semua pengawa ti dikemeranka kitai, jaku puji, peransang enggau sambut positif ari orang nya utai ti pemadu beguna.

Iya beguna laban chara nya ngasuh kitai rajin sereta meras agi ngereja pengawa. Orang ti kelansang pan tau nyadi landik enti selalu diberi jaku peransang enggau ansak positif.

Clemend ak Man @ Clemend Man iya ti bendar ukai orang baru ba dunya pemerindang. Dalam taun 2005
suba iya udah kala enggau orang ngerikod album kompilasyen ba kompeni SAVS di Serian.

Datai ari Kampung Bedega Serian, Clemend Man suah enggau orang bepekit belagu kenyau ari taun 2002. Beumur 30 taun, Clemend Man udah 14 taun nyadi artis SAVS sebedau mindah ngagai Twin Tone Production baka kediatu.

Ba SAVS Clemend Man ngerikod siti lagu ‘Dilah Enda Betulang’.

IDOLA…Clemend (dua kanan) begambar kenang enggau Andrewson Ngalai (kanan), Johny Aman (kiba) entara penanyi ti nyadi idola ba pengawa belagu.

Album Kedembi Kedemba

Album Kedembi Kedemba udah dipenyadi kena 13 April 2019 ba Dapuh Temuai Samarahan. Entara lagu
ke nyulut agi ba album nya diatu nya Bujang Serian enggau Kedembi Kedemba; siti lagu berentak joget.

Lapan iti lagu ba album Kedembi Kedemba nya Kedembi Kedemba, Mendam Ba Lubuk Ati, Bujang Serian,
Ukai Lubuk Dalam Genilung, Kumang Ku Timang, Putus Pengerindu, Mungkir Janji enggau Meruan
Sayau ( bepadu nyawa enggau Dorsica Robert).

Semua lagu ba album tu dirikot ba Twin Tone Production. Idola tauka orang ti dikerindu nya orang ti beguna
sereta mai reti dalam idup kitai. Idola ukai semina nyadi teladan tang idola mega endur kitai meda sereta
bebandingka tikas standard enggau kualiti diri enggau
orang bukai.

Reti nya kitai ulih nemu kualiti diri enggau kualiti orang bukai lalu ari nya kitai tau ngubah diri
ngagai tikas ti lebih manah.

MERINDANG…Clemend benung merindang ba sebengkah pengerami.

“Entara penanyi lama ke nyadi idola aku nya Andrewson Ngalai, Andrew Bonny James, Jackson
Amy, Rikie Andrewson enggau sekeda ke bukai ti enda ulih sebut aku ditu magang.

Sida tu ukai semina ngembuan sada nyawa ti badas tang lagu sida mega badas. Leka enggau tiun lagu ti badas ulih ngasuh ati kitai rindang lalu ulih muai penusah (teguran) ba ati”, ku Clemend Man nyaut tanya keterubah.

Ditanya baka ni lebas leka lagu ti badas ba penemu iya, Clemend Man madah cherita lagu meseti berurun, meri
peransang, pengagit enggau pengaga,”ku iya nyaut pasal leka lagu ti badas.

Bekunsika sekeda komen ti bisi ayan ba facebook; enti ulih leka lagu enda ibuh kelalu nyeriri orang. Enti salah
chara ngenataika jaku seriri nya, iya tau ngemaluka orang bukai.

Pekara pasal batang tubuh sesiku orang (pendiau orang) tau enda ibuh disebut taja leka lagu nya ukai beniat jai.

“Ba aku, siti agi pekara ti patut diperati nya bebasaka penanyi lama tauka senior. Sida tu udah dulu ngeran‐
dang jalai ba industri pemerindang.

Penanyi baru tentu bulih pelajar enggau chunto ba mayuh bengkah pekara ari sida. Nadai salah mega kitai betanya sereta bekunsi penemu enggau sida.

Taja pan pia, kitai mega arapka penanyi lama sama ulih begulai sejalai enggau artis baru,” Clemend Man sekali agi bekunsika penemu diri.

Pengawa Merindang

Nitihka producer Allen Nyuntai ari Twin Tone Production, Clemend Man ngembuan sada nyawa ti unik enggau alun nyawa ti nyelai ari orang bukai.

“Naka ke diatu Clemend Man bisi program merindang ninting minggu. Terima kasih ngagai semua peminat iya lalu ngagai kita ti bedau meli album Kedembi Kedemba; beli mih diatu,” ku Allen Nyuntai ke landik mega ngaga lagu.

Ngagai kita ti begunaka Clemend Man belagu tauka merindang ba menua tauka endur kita, kita ulih ngiga iya nengah facebook iya empu, kelab peminat Clemend Man tauka betanya ari Allen Nyuntai.

Kitai arap semua artis kitai Iban enda ninggalka adat enggau basa Iban dalam lagu sida.

Taja pan lagu nya bansa seni ti nadai tentu sekat enggau adan tang nama enggau adat bansa enda tau enda dijaga.

Selalu iya kitai enda ingat lebuh kitai ngaga leka lagu laban seleka pan leka jaku ti iya salah chara ngena tau ngemaruhka bansa diri enggau diri empu.

“Sebedau beserara, aku meri besai terima kasih ngagai semua orang ti udah mantu aku. Terima kasih producer Allan Nyuntai, komposer, penulis leka lagu, pemuzik enggau semua kaban ti semampai nyukung.

“Enda tinggal mega ngagai semua dj radio, kita ti udah kala ngundang aku belagu engggau kaban facebook ti selalu nyukung. Arap industri kitai makin maju lalu semua artis ulih begulai badas enggau pangan diri,”ku Clemend ngujungka randau.

Suara Sarawak