“ENTI sema kita enda kala puntan, tentu kita enda nemu tauka ngelala pemesai reti pemuntan sereta empas ba pengidup diri.

“Puntan tu sebagi ari proses belajar ngambi kita ulih nyingkang ngagai renggat bukai.

Nya entara jaku peransang Pemungkal StayInn Gateway Hotel & Apartment, Kuching, Clement Mixsin Luwan ti ngaku ukai muntang nyuluk pemujur ba dunya dagang.

Tang semua nya ulih dijapai enti ngembuan pengeransing sereta enda mudah mantul ati.

Lebuh pengerekai pandemik Covid-19 ti udah ngelabuhka dagang ba serata dunya, lain ga cherita Clement ti meda nya siti peluang numbuhka serikat hotel.

Dagang ‘ada’ maya pandemik nya ari buah runding peranak asal Kampung Bunan Pondok, Jalai Mongkos, Serian.

Clement nya mega anak ti bejualka kuih ngujungka iya bisi pengingin ngaul diri ba dunya dagang.

PENGINGAT AGI MIT

Mulaika kenang agi mit, maya beumur enam taun Clement suah nyempulang indai iya nyual kuih ba klinik perintah penyauh urung dua kilometer (km) ari rumah.

Ari bedarat mai kantung wi, udah nya ngena motosikal nyentuk dagang majak maju ngujung sida sebilik ulih meli entukar dikena bedagang.

Ari pengeransing sida sebilik bejualka kuih ninting hari meh dikena iya nyapai juluk ati nampung pelajar tinggi dikena ngubah nasip sida sebilik.

Ungkup penerang, Clement bulih pelajar tumu ba SRB St Jude Bunan lalu nampung pelajar ba Sekula Sekondari (SMK) Taee Tebakang, Serian.

Udah nya, iya nampung pelajar renggat kolej Diploma Perniagaan (Segi College) enggau Bachelor Business Administration Human Resources di Open University Malaysia (OUM). 

Dikena nyapai juluk ati, Clement ngaga pemutus belelang ngiga penemu lalu ngaul diri ba bemacham bansa dagang.

Ari peneleba 17 taun ba dunya dagang, Clement diatu bisi pengelandik ba Operasyen Dagang lalu bisi sekeda dagang ti mai singkang iya majak berani nuju dagang ti besai agi.

Taja orang bukai ngembuan peragam mayuh dagang bangkrap tauka ‘lungkup’ maya pandemik tang Clement ngembuan penemu bebida lalu ngumbai nya siti ari ‘peluang’.

SITI PELUANG

“Covid-19 tu mungkal dagang aku taja pen mayuh orang enggai numbuh dagang laban enggai ke diri pulai ke pengerugi.

“Penemu siku-siku mensia enda sebaka, engka orang bukai enggai numbuh dagang laban ngumbai timpuh nya tau pulai ke pengerugi.

“Tang ba aku nya peluang besai ngerembaika dagang diri. Taja pia, pengawa tu enda muntang laban kitai meseti bisi strategi nentu dagang beretan lama.

“Nadai siku ba dunya tu deka ke dagang nya rugi enggau majak pulai ke pengerugi.

“Sigi amat, pedis deka ngepunka dagang ba bulan keterubah laban gawa kediri, semua dikereja kediri magang,” terang iya.

Taja pia, iya nerima sukung ari bakih sama gawa ti sanggup nerima gaji mit lalu sida sebuat napi operasyen suku taun keterubah enggau mayuh pengerugi sereta belajar pekara baru.

RESIA PEMUJUR Tang, sida sebuat udah lepas ari semua penguji nya lalu diatu dagang majak maju enggau dikelala mensia mayuh kelebih agi bala penguna ba Kuching.

“Terima kasih ke inisiatif perintah baka Program Sia Sitok dipejalai Opis Menteri Dagang Temuai, Seni enggau Main Asal (Motac) enggau Penjana Kerjaya ari Perintah Besai.

“Program baka tu mayuh mantu kami lalu tim kami mega nyendia servis pemadu manah nentu hotel tu majak pegari,” ku iya seraya meri terima kasih ngagai perintah ti udah mayuh mantu ngelakuka dagang.

Ba Clement, “analogi magnet” nya meh resia pemujur ba pengidup iya.

“Sekali ke ngiga magnet tauka nyadi magnet.

Pengudah kita ngiga magnet, kita meseti ngiga pekara dikeingin ati begulai enggau bala bakih ti ulih mai datai ba ‘adan’ ti deka dituju.

“Kita meseti ransing ngiga magnet nya baka macha bup, ngulu kus tauka duduk ba pak kopi seraya beratika pekara ti bisi besangkut paut enggau juluk ati,” ku iya.

Nambah ke nya ku Clement, nyadi magnet ku iya nya pengudah kita ulih narit ati mensia mayuh.

“Pekara baka tu nentu pengawa dikereja kita pulai ke pemanah.

Pemai kita nya bepanggai ngagai sapa enggau kita begulai lalu berundingka pekara ti deka dikereja udah tu,” ku iya bekunsika resia pemujur.

Genap dagang udah tentu bisi pemar enggau penguji.

Ba penemu Clement, pemar besai diasai ke iya nya lebuh begulai enggau bala bakih enggau pengereja pengawa iya.

“Kebuah pia laban pemujur genap projek sereta dagang, semua tu bepanggai ngagai baka ni begulai sereta meri jaku peransang ngagai orang ti begulai enggau kitai.

“Pengilap suah nyadi lebuh kitai ngaga pemutus nitih utai ti nyadi, tu tau pulai ke laya tang meseti diputar enggau lengkas,” ku bujang Bidayuh nya.

ASAM GARAM DAGANG

Penguji kedua diasaika Clement nya bekaul pemansut, nadai ngira ba pengawa tauka dagang.

Suntuk pemansut tu entara pemar besai lalu begunaka penyikar enggau kreativiti.

Pemansut, kereban, pekara wang tauka pengereja pengawa, semua nya tau ngubah dagang enti enda ulih ditemu ba timpuh ti engkeman.

Bekunsika kenang pait, Clement madah, iya kala ditikau penguna ngena changkir ba pak kopi.

Taja bisi kenang pait tang iya mega ngasaika mayuh kenang manis sekumbang udah nyadi pedagang.

“Kenang pemadu manis kala diasai aku nya lebuh ba atas panggau enggau dikangau bekunsika pemujur diri ba mua tuai serikat tebilang dunya,” ku iya temegah enggau pengeransing diri ngelama tu.

Besai pengandal Clement ngambi ulih nyadi magnet lalu begulai enggau sapa-sapa aja nempa pekara baru ba pengawa dagang enggau komuniti.

Ngena peluang nya mega, Clement bisi bekunsika pesan enggau jaku peransang nuju rebak biak ti deka ngaul diri ba dunya dagang taja suah puntan.

“Seagi idup ba dunya tu, sigi bisi aja penanggul, penguji nuntung kitai ngambi bulih pemujur enggau nyapai juluk ati.

“Dunya dagang tu chukup mayuh penguji tang bisi pengelebih iya. Taja pia, anang berundingka pemanis aja laban bisi maya kitai tau labuh enggau alah laban penguji.

“Pesan aku, ati meseti kih sereta runding meseti inovatif enggau kreatif ngambi semua pengawa dikemujur belama,” ku jaku peransang iya.

JULUK ATI

Pengudah napi bemacham penanggul enggau penguji ba dunya dagang, Clement ngandal ke sukung tegut mensia mayuh ba chap dagang menua.

Clement madah baru, nya nentu ke chap dagang majak diterima nengah pengawa ngaga promosyen ba pelasar media rama enggau pelasar bukai ngambi serikat iya majak beretan enggau pegari nama.

StayInn Gateway Hotel & Apartment berambai ke jaku ‘A Home, Far Away From Home’ nya tau disebut, taja pen kediri, bedua tauka begulai enggau bala bakih sereta diri sebilik ulih meh ngasai ke diri diau ba rumah kita.

Taja pen kita jauh beribu batu ari rumah maya raun enggau diau ba hotel, nya meh ‘rumah’ dikena kita ngasai ke pengidup baru tauka raun ngagai menua bukai.

StayInn nya ba Pasar Kuching (The Golden Triangle) ke mega Pangsapuri Gateway.

Seraya lobi enggau opis ba Ringkat Empat Gateway Kuching lalu Hotel sereta Pangsapuri ari Ringkat Lima ngagai Ringkat 15 Kompleks Pangsapuri Gateway. – KALSUM MOHAMMADIN.