Covid-19 di Sarawak siti kluster punas, tiga agi baru ditemu

KUCHING: Tiga kluster baru Covid-19 dirikodkaba Sarawak kemari taja siti kluster ditukuka udah punas.

Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka tiga kluster tu iya nya Kluster Tembok ba Pelilih Menua Sri Aman, Kluster Sungai Mupong, Meradong enggau Kluster Sungai Rassau, Matu.

“Kluster ti udah punas iya nya Kluster Jalan Ho Pin pengudah nadai ngerikodka kes positif dalam timpuh 28 hari,” ku iya.

Kelimpah ari nya, Uggah madahka pemutus JPBN kemari madahka Atur Mindah Betegang Diteritka (PKPD) dipejalaika ba Kampung Binyu Baru, Samarahan berengkah kemari nyentukka 17 April tu ila.

“Pemutus tu dipejalaika meda penyampau kes positif ti niki ngenyit sereta lalau ari KKM.

“PKPD ti dipejalaika tu deka ngemuntangka raban KKM ngiga kes ti dipelabaka berampit Covid-19 ngambika sida lengkas dipindahka awakka enda ngerampit orang bukai,” ku iya.

Nangkan nya, iya madahka Pelilih Menua Sarikei bebali ari status oren ngagai mirah kemari pengudah ngerikodka 65 kes berampit dalam timpuh 14 hari.

“Pia mega, Pelilih Menua Marudi udah bebali ari status kuning ngagai oren pengudah ngerikodka 23 kes berampit.

“Pelilih Menua Lawas bebali ari status gadung ke status kuning lebuh dua kes berampit dirikodka sehari tu (kemari).

“Naka diatu bisi tujuh buah pelilih menua mengkang ba status gadung,” ku iya.

Suara Sarawak