Covid-19 majak ngerekai, 25 kes baru positif di Sarawak

KUCHING: Bisi 25 kes baru Covid-19 dirikodka ba Sarawak sehari tu ti ngujungka penyampau kes tu di Sarawak nambah 985 kes.

Chairman Komiti Peyangga Penusah Ngenyit Negeri (JPBN) Datuk Amar Douglas Uggah Embas madahka siti ari kes tu endang diperesa entara orang kontak dampih enggau Kluster Baki.

“Kes kala diperesa rT-PCR Covid-19 tang pemutus madahka iya negatif tang ba peresa dua kali kena 5 November ngenuku iya positif.

“Semilan kes nambah ba Kluster Greenhill iya nya lima iku indu enggau empat iku lelaki,” ku iya madah nengah aum pemberita di Dun Lama ditu, tadi.

Tandu Uggah, semua kes baru ari Kluster GreenHill tu endang orang ti bekaul enggau kes positif ti sebedau tu baka diri sebilik, bakih, amah enggau ke bukai.

Bisi enam iku ditemu nengah peresa rT-PCR Covid-19 kali ti kedua di klinik perintah lalu siku ditemu nengah peresa ba makmal peribit.

“Kelimpah ari nya, tujuh kes baru ba Kluster Wisma Seberkas ke alai enam kes ditemu ari kaul rat lalu siku agi bejalaika peresa kediri.

“Semua sida diperesa kena 4 enggau 5 November lalu ditemu positif kena 6 November,” ku iya.

Nangkan nya, Kluster Seladah ngerikodka dua kes ti ditemu ari kaul rat kes positif kluster nya sebedau tu.

“Siti kes ditemu lebuh siku indu deka beputung enggau siti agi kes ditemu lebuh siku pilot bilun deka pulai ke menua iya empu.

“Pia mega, empat kes dirikodka lebuh sida beperesa kediri empu ketegal ngasaika diri bisi kaul enggau orang ti udah kena rampit Covid-19 sebedau tu,” ku iya.

Naka diatu, bisi lima kes baru udah suman sereta dikemendarka pansut ari sepital diripotka.

“Semua sida dikemendarka pansut ari Sepital Besai Sarawak.

“Nya ngujungka kes suman sereta dikemendarka pansut ari sepital nambah ngagai 812 iku,” ku iya.

Suara Sarawak