Covid-19 : Serian diatu zon gadung, tinggal Kuching enggau Sibu agi zon kuning

KUCHING: Bagi Menua Serian diatu betukar ngagai zon gadung pengudah 14 hari bejurut nadai ngerikodka sebarang kes baru positif Covid-19 .

Sekretariat Komiti Penyangga Penusah Ngenyit Nengeri Sarawak (JPBNS) madahka semina dua pelilih menua aja agi mengkang ba zon kuning iya nya Kuching enggau Sibu.

Tu ngujungka naka tu, bisi 38 pelilih menua ba nengeri tu udah dikategorika zon gadung.

Kelimpah ari nya, JPBNS mega madahka nadai kes baru positif Covid-19 sehari tu.

Nya alai, penyampau kes positif ba nengeri tu mengkang ba 545 kes naka sehari tu.

Berebak enggau nya, JPBNS ba penerang nya madahka bisi enam kes udah suman lalu dikemendarka pansut ari sepital.

Ari enam kes nya, empat kes ari Sepital Besai Kuching (SGH) lalu Bintulu (2).

Ungkup rikod, diatu bisi 470 kes tauka 86.24 peratu kes positif ba nengeri tu udah suman sereta dikemendarka pansut ari sepital.

Suara Sarawak