Covid-19 : Tau kinsil perambu pulai Gawai Dayak

KUCHING: Serakup Dayak Sarawak Nasional (SDNU) nyukung penemu dipansutka Malaysian Medical Association (MMA) ti minta peranak Sarawak ke diau ba luar nengeri tu ngambika enda ibuh mulaika diri ngagai Sarawak nyerumba pengerami baka Gawai Dayak.

Presiden SDNU Tan Sri William Mawan Ikom madahka pekara nya patut dipadahka ngagai diri sebilik tauka kaban belayan ke diau ba luar nengeri tauka ba menua bukai di Malaysia ti deka mulaika diri ke menua maya pengerami Gawai Dayak ti deka datai.

“Malaysia nerima empas ti balat bekau ari pengerekai Covid-19 sereta status Atur Tagang Pejalai (PKP).

“Nya alai kitai meseti seruran bejaga ba sebarang pemutus ti digaga kitai sereta enda meri penanggul ngagai pengelikun diri empu enggau orang bukai,” ku iya madah ba siti penerang kemari.

Mawan ti mega Adun Pakan madahka ba pekara tu, SDNU setuju enggau MMA sereta Komiti Penyangga Penusah Ngenyit Nengeri (JPBN) ti enda ngemendarka sida ke diau ba kuar Sarawak pulai ke menua maya kemisi Gawai Dayak.

“Aku minta genap iku raban SDNU ngambika meri kerejasama sereta nginsilka dulu perambu pulai Gawai sida ke taun tu,” ku iya nambah.

Nangkan nya, iya mega madahka sida meretika pengeran sida ke diau ba luar nengeri ti deka mulaika diri betemu enggau diri sebilik maya kemisi nya ila.

“Taja pia tu ukai semina ketegal Gawai Dayak aja, tang berundingka pengidup orang ke begulai enggau kitai,” ku iya.

Berebak enggau nya, Mawan meri besai terima kasih sereta meri tabi puji ngagai raban gawa ba luan Sarawak ti bebendar nagang pengerekai Covid-19 ba nengeri tu lalu mujur ngerikodka nadai kes baru positif Covid-19 ba nengeri tu.

Iya mega ngarapka kes positif mengkang nadai dirikodka ba nengeri tu.

“Sekali agi aku nandu sereta ngelalau mensia mayuh ngambika nyaga takah enggau pangan diri, seruran mai hand sanitizer begulai enggau kita sereta ngena sengkabung mua,” ku iya.