Covid-19: Tinggal 220 buah sekula bedau ulih dibuka

KUCHING: Penyampau 1,045 buah sekula primari perintah di selampur Sarawak udah dikemendarka dibuka baru berengkah 8 Mac tu.

Komiti Penyangga Penusah Ngenyit Nengeri (JPBN) begulai enggau Opis Pelajar Nengeri Sarawak ngarika Opis Menteri Pelajar Malaysia (KPM) dalam siti penerang media kemari madahka nya ngaul 231 buah sekula primari ba Sarawak ti dikemendarka dibuka nambahka penyampau 814 buah sekula ti dibuka bepun 1 Mac tu tadi.

Ku penerang nya, pemutus tu digaga pengudah berundingka pangka Atur Pengawa Standard (SOP) enggau Chara Baru 2.0 ti dikeluarka KPM.

Taja pia, JPBN madahka 220 buah sekula ti ba sitak mudah kena rampit Covid-19 agi bedau dikemendarka dibuka nyentuk 14 Mac tu ila.

Berebak enggau nya, Sarawak ngerikodka 250 kes positif baru Covid-19 kemari.

Nya ngujungka penyampau kes positif di Sarawak nambah 10,674 kes.

Kes positif tu nyengkaum dirikodka ba Pelilih Menua Sibu penyampau 123 kes, Meradong (36), Bintulu (21), Kuching (17), Kapit (17), Miri (14), Julau (7), Serian (4), Daro (3), Asajaya (2), Samarahan (2), Selangau (2), Dalat (1) enggau Sri Aman (1).

Nangkan nya, bisi 174 kes baru udah suman sereta dikemandarka pansut ari sepital dirikodka kemari ba Sepital Sibu (61), Sepital Bintulu (37), Sepital Besai Sarawak (34), Sepital Sarikei (21), PKRC Sepital Kapit (9), PKRC Sepital Sri Aman (9) enggau Sepital Miri (3).

Nya ngujungka penyampau kes udah suman sereta dikemandarka pansut ari sepital di menua tu nambah 8,141 iku.

Suara Sarawak