Dadah berega RM955,500 dirampas

KOTA SAMARAHAN: Dadah bansa syabu pemerat 23,879 gram dipelaba berega RM955,500 mujur dirampas Polis DiRaja Malaysia (PDRM) ba sebengkah operasyen kena Hari Tiga tu tadi.

Kepala Polis Sarawak, Datuk Aidi Ismail madahka siku lelaki beumur 31 taun, asal ari Sabah ti mega tokan dadah mujur ditangkap ba operasyen nya.

“Seraban polis ari Opis Pansik Penyalah Narkotik (JSJN) udah matau ba tisi Jalai Stutong urung pukul 9 pagi Hari Tiga tu tadi.

“Ba operasyen matau nya, JSJN mujur nangkap siku lelaki pengudah diperati nyelai nguji ngelalaika siti tungkus plastik ba babas semak sebuah sepital peribit,” terang Aidi.

Aidi mansutka jaku nya rambau aum pemberita di baruh Seksyen 39B Akta Dadah Berbahaya 1952, Bersabit Sungai Maong RPT:/752/2021 dan Batu Kawa RPT: 2401/2021, ditu kemari.

Nambahka nya ku iya, sida mujur tetemuka 18 piket plastik bemacham pemesai ngundan leka Kristal dipelaba dadah bansa syabu pemerat 145 gram.

Ku iya, saspek diasuh madahka dini rumah iya ngambi raban polis meresa rumah nya.

Lebuh meresa bilik keterubah, Aidi madahka sida mujur tetemuka siti kantung chura mirah ngundan 21 tungkus teh china bisi tulis ‘Guanyinwang’ lalu dalam nya ngundan dadah bansa Syabu dipelaba berat 21,884 gram.

“Udah nya, kami mega tetemuka sekutak polisterin burak ngundan 141 piket plastik dipelaba dadah bansa syabu pemerat 1,850 gram.

“Pia mega, kami udah ngerampas dua dachan digital, siti kereban nungkus plastik chap PFS enggau siti guntin,” terang iya.

Raban polis mega mujur ngerampas siti tungkus plastik chelum ngundan plastik puang bisi tulis ‘Guanyinwang’, sekutak plastik puang bemacham pemesai enggau siti kantung chap Ririxing.

Aidi mega madahka semua dadah ti ditemu nya udah dirampas enggau nyadi barang kes lalu saspek ditangkap enggau dibai ngagai JSJN ungkup pansik silik.

Saspek mega ditemu positif dadah bansa Ketamin lebuh diperesa ai kemi lalu iya dipansik di baruh Seksyen 15(1)(a) ADB 1952.

Kelimpah ari nya, polis mega ngerampas sebentuk tinchin saspek berega RM1,240.
Kes dipansik di baruh Seksyen 39B ADB 1952 lalu enti ditemu salah, saspek deka kena ukum sampai mati tauka dijil seumur idup tauka dilunsin enda kurang ari 15 kali.

Suara Sarawak