KUCHING: Strategi mutarka pengawa salah mai dadah tama ke Sarawak belalai deka diputar awakka ulih nagang pengawa enda menuku nya terus nyadi.

Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah madahka pengawa salah mai dadah tu majak nyadi nengah servis nganjung barang (kurier), kargo padang bilun enggau palan penyangkai kapal besai di Sarawak.

“Nya alai, aku meransang sekeda raban One Stop Committee (OSC) Mutarka Isu Dadah enggau Substance (MIDS) Nengeri meretika risiko dadah tama ke Sarawak nengah kargo.

“Pekara tu deka meri penemu ngagai sida sebedau ngatur aum OCS MIDS enggau Kepala Menteri kena 1 Julai tu ila,” ku iya.

Fatimah bejaku munyi nya lebuh nguluka raban OCS MIDS ngelawa Palan Kargo Penerebai Bilun Entarabansa Kuching ditu, tadi.

Ku iya, sida empu deka meda proses barang ti diterima ba palan kargo nya awakka ulih meratika sereta ngelai penanggul ti ditapi ejensi penerit adat dia lebuh ngelala dadah ti dibai kargo bilun.