Dadang Digital ke pelasar ngangkat penulin, penyelai enggau pengelebih manik

SIBU: Asil pengelandik jari jeman diatu agi ngetanka penulin enggau setail lama ditampung ari sida ke tuai menya taja dikerembai nengah pelasar dagang digital.

Raban bansa Dayak di Sarawak tebilang nama enggau asil produk pengelandik jari kelebih agi ti ditusuk ari leka manik lalu berita tu ngerembai ke serap dunya laban dikunsi sebelah media rama ti nadai sekat.

Nampung penemu sida ke tuai, manik tu nyadi pesaka asal ti ngembuan penyelai enggau pengelebih ngujungka komuniti asal bekenaka manik tu ba pengawa besehari sehari.

Komuniti asal ti agi rat ngemeranka manik ba daya idup sida iya nya bansa Iban, Bidayuh enggau Orang Ulu ti mungkur bansa Lun Bawang, Kayan, Kenyah, Penan, Murut, Kelabit, Kedayan, Berawan, Lahanan, Bisaya, Sekapan, Punan, Kejaman, Baketan, Sihan, Ukit, Tabun, Tagal, Lisum, Saban, Longkiput enggau ke bukai.

Ku sida ke tuai menya, manik tu mayuh bida ba tuju enggau guna nitihka daya idup komuniti asal ngemeranka iya baka dikena mantaika pengeraja, pemajik enggau status ruang bilik orang ti ngena manik nya.

MODEN KONTEMPORARI… Tengak ditusuk Gloria ari leka manik Kristal

Bisi sekeda penengkebang enggau pedagang manik nguji penemu baru nengkebang leka manik moden baka ari kacha, kristal, arkelik enggau batu geliga ti ngembuan gaya kontemporari tang agi ngetanka penulin setail iya taja napi ubah pemansang dunya enggau Revolusyen Industri 4.0 (RI4.0) kemaya hari.

Kenu ku Gloria Paula Sebia, 28 taun, siku pedagang manik ari Sibu penakan Iban Kenyah madahka genap manik bisi rega ti bebida nitihka bansa, chura enggau setail lalu ulih ditengkebang ari tanah ladu enggau macham utai bukai.

“Enti suba, manik digaga ari tanah ladu ti ditunyau enggau utai bukai, ditunu ngambika tan, teguh enggau chura enda mudah mali ngapa sereta ngembuan chura enggau setail diturai khas nitihka penau jari siku-siku.

“Kenu ku indai aku, bansa Kenyah ari Long Bulan di Belaga, peturun sida rindu agi ke manik ti mayuh chura dikumbai lukut lalu dibagi ngagai tiga renggat.

“Manik Lukut Sekala iya nya raja semua manik tauka digelar indu manik ti pemadu berega enggau ngembuan tipan jerita iya empu.

MANDING DIPEDA… Sekeda ari keresa ngepan Iban Indu enggau Lelaki ditengkebang ari pengelandik jari Gloria empu.

“Chura manik dikumbai lukut sekala tu endang segala chelum ti dikempi, dilagu enggau bungai rose ti dipilih baka kalas, kuning, biru enggau burak ti ngasuh iya mar rega.

“Enti kelia, rega Manik Lukut Sekala tu disema baka rega indu ulun besai tuai, lalu suah ditusuk nyadi tengak enggau nyadika derian maya melah pinang,” ku Gloria bekunsi sekeda penerang pasal pesaka dikembuan bansa Kenyah.

Pia mega ku iya, Orang Ulu ngembuan bemacham produk manik ti dikumbai Bao Dar’ ti ditusuk ari leka manik mit.

Guna Bao Dar’ tu dikena ngelagu temilah, sarung nyabur enggau ilang, nyadika marik disangking ba gagung, ditusukka tangu tauka marik empang, gelang enggau selampai sereta ke bukai.

Bansa Iban mega chukup angkunka seni manik dikena ngelagu ngepan asal sereta ngembuan setail enggau nunda buah tauka bungai pua kumbu, ku Gloria.

BUAH LAMA… Sekeda ari keranjai jari Gloria ti nerima mayuh peminta.

“Ambika chunto, ngepan lelaki baka baju burung enggau sirat ti diputung ari kain tenun sereta lampit pirak mega dilagu ngena leka manik, beburai, suah agi ngena leka manik mit enggau besai baka buah pelaga.

“Pia mega ngepan sida ke indu ti ngerasuk marik empang ditusuk ari leka manik Orang Ulu, buah mega ngambi buah pua kumbu nitihka peningi penemu orang siku-siku, chukup manding dipeda.

“Kitai bansa asal endang deka beratika pemisi ruang bilik nya ari keresa ti dikena sida nyengkaum keresa digaga ari manik.

“Nya alai kitai ulih ngangkatka manik tu nyadi keresa pemadu berega dikena beranakka puku ti ngemai penguntung sekalika ari sukut barang tauka mata duit,” ku Gloria madah nyemetak.

Pemanah timbal enggau rega makit produk manik mega nyadi peransang Gloria ngemansangka diri ba dagang tu sereta ngiri macham penemu ari kus, bengkel enggau kelas ti diatur raban ejensi enggau opis bekaul.

ANGKUN… Gloria mantai enggau bejualka asil pengelandik jari ditusuk iya ari manik.

Ku iya, penemu endang nadai kala abis dipelajar, agi tubah utai apin dipelajar kelebih agi pasal produk asil pengelandik jari ari manik tu nyengkaum chara ngelakuka produk enggau dagang nengah ekonomi digital ti dipejalai perintah diatu.

“Makin jauh singkang pejalai, majak mayuh utai enggau penemu baru dipelajar kitai, enda alah tiap pemayuh kus enggau bengkel udah digulu, tang aku agi ngasaika diri ala penemu, agi kurang penau ari peneras dunya mansang.

“Naka ulih mansal diri nitihka singkang orang bukai, tambah dibai ati keran dekaka pemujur kelimpah angkunka pengawa tu kenyau ari sekula nyentuk diatu.

“Semua tu nyadika peransang aku ngemajuka diri, ngangkatka dagang manik tu sama tikas enggau dagang asil pengelandik jari bukai,” ku Gloria madah nyemetak.

Nyerumba Pengerami Main Asal Dayak Borneo (BDCF) 2019 tu tadi, Gloria mega enda masau peluang ti bisi disedia piak pengatur.

“Aku bisi bejual bemacham asil pengelandik jari ari manik. Gagit amat asai ati mega timbal bala pengusung ti bisi datai ngusung bangsal aku lebuh nya lalu bekunsika macham buah randau.

“Kelimpah ari ngiga belanja tambah, aku mega bulih bakih baru, ngelala main asal enggau produk dijual bala bukai sereta ngiri penemu baru ari peneleba bedagang ba pengerami besai, ditapat bala temuai ari menua luar.

“Pengerami besai baka tu awak pemadu manah ngelaku produk sereta mantaika chap dagang kitai kelimpah nengah media rama baka Facebook enggau portal online bukai.

“Taja tu ukai keterubah aku ngulu BDCF, tang ati semampai gagit laban genap taun, mayuh peneleba enggau pekara baru diasai, bisi pengelain enggau bida,” ku iya lebuh dirandau Suara Sarawak.

Nangkan nya ku Gloria, awak lepa mega diisi enggau pengawa ti ngemai pemaik enggau asil sereta runding mega nadai limpang laban ati rindang nusuk leka manik.

Gloria tu siku pedagang enggau kaban di baruh embing Serakup Kraf Jari Sarawak enggau Serakup Kraf Jari Malaysia sereta nerima kala nerima bantu ari Opis Mara dikena ngerembaika dagang iya.

Iya mega chakah ngaul diri ba dagang enggau pengawa mandangka asil pengelandik jari nyengkaum nyadi penyereta AgroFest di Bintulu, Minggu Kraf di Sibu enggau Bintulu sereta mayuh ke bukai kelimpah numbuhka dagang diri empu sebelah makit enggau kaki lima.

Ngena chap dagang Aneka Kraf, Gloria nyingkang jauh agi ngemai juluk ati besai ngerembaika dagang manik iya dataika renggat entarabansa jemah.

“Inisiatif ekonomi digital ditibak ari penemu Kepala Menteri Abang Johari Tun Openg meri peluang besai ngagai kami, pedagang kraf di menua tu ngerembaika dagang diri.

“Ba aku empu, pintu rejeki sedandang agi nengah peluang baka tu ke alai perintah mantu kitai nyungkak ekonomi ruang bilik kelimpah ari geran bantu sereta latih dikena ngenegapka penemu enggau penau sereta pengulih produk pengelandik jari ba rentayan makit entarabansa.

“Kebuah pia laban asil pengelandik jari digaga ari manik tu dikena nyauka serap etnik di Sarawak lalu nyadika keresa pemadu berega ngagai bansa asal.

“Aku pechaya sereta andal amat manik tu nyadi daya idup komuniti di Sarawak deka seruran diterima sida ti rinduka manik ari selampur dunya lalu ulih tetangkup peminta makit entarabansa,” ku Gloria nyimpul randau