KUCHING: Benak Raya Entreprise dipungkal Imelda Bragie Jamie dipilih nyadi ‘socialenterprise’ kelima ba baruh Hong Leong Bank (HLB) Malaysia.

Direktor Besai Kumpulan ti mega Tuai Pemesai Eksekutif HLB Domenic Fuda madahka sida nyukung Benak Raya awakka pengawa dagang nya terus beretan tegap dalam industri tu.

“Sukung rama enterprise kami ti keterubah ari Malaysia Timur nuju siku indu Iban ti balat ngemeranka pengawa mantu komuniti iya ngulihka pengidup ti meruan ari pengawa bumai padi.

“Pia mega, indu tu angkun ngetanka adat asal betanam padi awakka enda lenyau ari pengidup,” ku iya.

Ku iya, sida temegah meda inovatif ti digaga Imelda ukai semina ungkup produk asi tauka pemakai baka ai irup enggau produk pemajik gamal tang ngelui ari nya baka ngagai straw ai irup ari berau.

“Kami ngarapka kerejasama enggau Benak Raya deka ngatur mayuh agi pansik enggau pemansang (R&D) awakka ulih ngasilka produk inovatif bukai ungkup nyaga rampa menua,” ku iya.

Berebak enggau nya, Imelda lebuh ditanya madahka iya berasai gaga sereta temegah lebuh HLB meri peluang produktif ngagai Benak Raya Enterprise mantu komuniti di Simanggang seraya ngetanka adat asal orang bumai padi.

“Chara betanam padi di Simanggang sigi bekaul rat ngagai adat asal orang Iban.

“Lebuh ngetanka pengawa nanam padi di menua aku, aku meda peluang tu amat manah nambahka penatai pemisi komuniti enggau ngangkatka sida ari tikas penyeranta,” ku iya.

Tandu Imelda, nengah kerejasama tu iya andalka ulih ngerembaika dagang maya napi penanggul ti mar sereta terus beretan dalam industri.

“Pia mega, aku andalka kerejasama tu deka meri peluang ngagai kami mantu mayuh agi orang Iban ngulihka penatai pemisi,” ku iya.

Benak Raya Enterprise siti dagang bepelasarka berau ti ditanam ba Simanggang.

Dagang tu ukai semina bejual berau tang mega mungkur produk inovatif bukai baka ai irup, produk pemajik gamal enggau straw ai irup ari berau.