Dagang chara ‘online’ majak dikerindu rayat Sarawak

KUCHING: Rayat Sarawak dirikodka meli barang penyampau urung RM19.42 juta nengah media rama taun siti nyin kemari.

Menteri Muda Dagang Entarabansa enggau Industri, Terminal enggau Pemansang Orang Dagang, Datuk Mohd Naroden Majais madahka rayat Sarawak mayuh milih meli barang nengah Zalora, Lelong.com enggau Qoo10.
“Entara barang ti mayuh dibeli nengah media rama iya nya gari bala indu.

“Nya alai, aku ngadang penyampau tu majak betambah enti sema kitai ulih ngempung penerang ari makit enggau media rama bukai,” terang iya.

Iya mansutka jaku nya lebuh bejadi Randau E-Dagang Sarawak Edisyen Kedua ngarika Kepala Menteri Datuk Patinggi Abang Johari Tun Openg ba sebuah hotel tebilang ditu, apin lama ke udah.

Kenu ku Naroden, Mayuh produk ba Malaysia ngerikod ASD 1.3 bilion nengah e-dagang lalu disadang nambah ngagai ASD 2.53 bilion manggai taun 2022.

“Nya alai, Perintah Sarawak ngagihka belanja penyampau RM1 bilion dikena nirika tiang pemachar ngambika arus penyambung ulih dikerembai ba menua tu.

“Inisiatif tu ulih ngaul mayuh agi rayat kelebih agi sida ti diau ba kandang menua ulu dalam aktiviti e-dagang taja mayuh produk sereta penyambung infrastruktur nyengkaum perengka pengangkut,” ku iya nerang.

Nambahka nya ku iya, bisi sekeda model baru dalam dagang iya nya dropshipping lebuh pengawa bejual beli ulih dipejalai taja infrastruktur enggau perengka pengangkut enda mayuh.

“Ambika banding, dropshipping ba Malaysia ulih ngelakuka produk ari China ngagai makit Eropah.

“Lebuh penguna ba Eropah meli produk nya, kereja mungkus enggau nganjung barang dipejalai ba serikat asal iya nya ari China,” terang iya.

Nya kebuah ku iya, rebak biak patut ngerebut peluang dalam e-dagang chara kreatif enggau inovatif ngemantupka ati bala penguna ari sukut mayuh bansa produk enggau rega.

Suara Sarawak