Dagang ngepan Iban nyungkak penatai pemisi

KUCHING: Siti set penuh ngepan indu tauka siti set ngepan lelaki Iban enti dibeli magang manggai RM1,000 tauka lebih.

Kaban Kunsil Nengeri (Adun) Layar Gerald Rentap Jabu madahka industri dagang ba pekayan tradisional kitai Iban endang chukup berega.

“Siti set penuh dikena siku indu bepun ari pala (sugu ganggang), tanggu, selampai, gelang jari, lampit, kain kebat, gelang kaki enggau perengka bukai rega utai tu manggai RM1,000 lebih.

“Semua utai tu ulih nyadi dagang sereta nyungkak penatai pemisi laban kitai Iban kaya enggau adat sereta main asal. Mayuh agi asil pengelandik jari bansa kitai ti tau nyadika produk dagang,” ku iya.

Gerald bejaku munyi nya ba Pengerami Beserumpu Ngintu Tembu Belajar Main Asal sereta Nyuaka Setipikit Akedemi Raban Dayak Iban Sarawak (Akademi Sadia) di sebuah restauran ditu, ensana.

TAMAT KELAS MAIN ASAL…Gerald Rentap Jabu (bediri, tujuh kiba) enggau Mabong Unggang (bediri, enam kiba) begambar kenang enggau bala ti udah tembu kelas ngajat.

Ku iya, pengerami ti diintu malam nya patut dikemegah laban ngintu sida ti tembu belajar main asal baka betabuh, ngajat sereta bekuntau.

“Kita ti belajar tu ke ditemu aku bisi nya udah ngambi PhD nyentuk ke nembiak mit sama bela angkun deka ngintu main asal bansa kitai.

“Pia mega, program ti baka tu amat jarang diatur ba Kuching laban kitai sama kiruh gawa sereta ngereja pengawa bukai.

“Main asal baka tu ti patut ditanka kitai laban nya kelai identiti Iban,” ku iya.

Tambah Gerald, kelimpah ngetan adat asal tu, kitai Iban mega patut begulai sejalai dalam sebuah komuniti laban nengah serakup komuniti aja kitai ulih ngetanka hak bansa.

Nangkan nya, Ketuai Akedemi Sadia Mabong Unggang madahka pengerami ti diintu sida malam nya renggat ti ke-13 udah diatur.

“Bisi nya orang tuai, nembiak mit, pelajar sekula sereta ke bukai sama bela deka ngelatih diri betabuh, ngajat enggau bekuntau,” ku iya.

Kemari Gerald lalu madahka iya meri agih belanja RM5,000 ngagai raban nya dikena neruska kereja manah ditur sida.

Pengerami malam lalu nyuaka setipikit ngagai 51 iku bala nembiak ti mujur nembuka latih ngajat iya nya indu 28 iku, ngajat lelaki 17 iku, bekuntau tiga iku enggau nebah sape enggau belikan tiga iku.

Sama bisi datai Presiden Sadia Sidi Munan, bala pengajar enggau bala bukai.

SETIPIKIT BASA…Gerald Rentap Jabu (tiga kiba) nyuaka setipikit ngagai nembiak lelaki ba Pengerami Beserumpu Ngintu Tembu Belajar Main Asal sereta Nyuaka Setipikit Akedemi Raban Dayak Iban Sarawak (Akedemi Sadia) di sebuah restauran ditu, ensana.

Suara Sarawak