KAPIT: Tekuyong Buriek Kapit (TBK) tu siti chap dagang ti cukup terbilang ba menua Kapit ngaga enggau ngeluarka produk kraf jari ari buriek kenyau ari taun 2018 suba.

Taja pia, mayuh orang enda nemu sapa bagi orang ke ngempu produk chap dagang Tekuyong Buriek Kapit tu kebendar.

Nya alai, Suara Sarawak mai kitai bekelala enggau siku agi orang ti landik enggau ngemeranka pengawa pengelandik jari sereta bedagangka produk kraf jari ari Kapit.

RINDUKA KERESA LAMA

Penatai asal ari Rumah Jala, Sungai Melinau di Mujong, Clement Kanyan Wong endang rinduka keresa lama kelebih agi bansa Iban adap Batang Rajang.

“Laban ke sigi nampung bilik tuai, dia mayuh keresa lama enggi niang ini enggau niang aki kami meruan disimpan nyentuk sehari tu.

“Ukai deka begendangka pemisi diri, tang meh keresa tu endang udah diibun kami sebilik kenyau ari tujuh serak datai ba tubuh aku empu.

“Ba aku empu, tu tau mega dikumbai pesaka asal mandangka pengaya enggau pengeraja bansa kitai Iban nyengkaum keresa digaga ari buriek,” ku iya nampung kenang.

Ba bulan March 2018 suba lebuh mua tajau lama, dia Kanyan bisi tetemuka dua lambar kain buriek lama enggi niang ini aki iya suba.

“Empa pengelama kain nya udah ditaruh dalam tajau, dia isi kain nyau mayuh udah retai enggau bekuap.

“Laban endang sayauka keresa lama, aku lalu teulihka runding muka kerubung buriek lalu dijait ba kain baru, nunda ukir asal ba kain lama nya tadi.

“Berindik ari nya, aku nyau labuh pengerindu ba pemanah enggau penyelai kraf jari kitai bansa lalu mupuk belajar nyait kerubung buriek,” ku iya nikalka kenang diri.

Pengudah kain buriek tembu dijait enggau diadu kemas, dia Kanyan lalu nganjung anak dara iya benama Dayana Nora Wong masuk Pekit Kumang Gawai 2018 di Kapit.

Puji Tuhan laban anak iya bulih gelar Lulong ba pekit nya lalu nyadika peransang ngasuh iya ransing agi ‘nyabung’ pengelandik jari diri begagaka perengka ngepan Iban.

“Beduduk ari nya, aku lalu ngiga buri baru sereta meratika kain buriek maya nya suba endang udah bisi orang begaga sereta bejualka kraf jari nya di menua Kapit.

“Aku betemu enggau Annie Anthony Belikau, siku ari indu ke udah mungkal pengawa begagaka kain buriek di Kapit lebuh nya lalu iya tu meh nyadi mentor aku,” ku lansa anak penakan Iban China nya.

KERANJAI JARI KETERUBAH

Kanyan nampung pengawa begagaka produk buriek dalam bulan Ogos 2018 ke alai iya nguji ngaga kain buriek ngena kain kangan dua lambar.

Udah kain buriek nya tembu, dia iya lalu mantaika keranjai jari keterubah nya ba Facebook lalu dibeli orang tekala nya.

“Nadai lama endur kain nya udah dibantai aku ba Facebook lalu ‘dichanggai’ orang, nadai entu beleman tudah ke meli, nadai mega betawar rega.

“Ati din nyau ransing agi meh deka begagaka kain buriek udah nya laban udah ninga jaku puji enggau peransang ari sida ke meli,” ku iya lalu tuchum manis.

Ba bulan September 2018, Kanyan nguji baru begigaka kain buriek tang sekali tu iya nguji ngena leka buriek ari menua China ti diudar ngena chara online.

Iya madahka diri enggai enda nguji ngena leka buriek bansa nya laban leka tekuyung buriek asal mar amat digiga lalu suah pungkang bekal di Kuching.

“Tambah mega leka buriek ari menua China tu mayuh dijual, pemilih kitai ni pemesai dikedeka lalu rega mudah agi ari tekuyung buriek asal.

“Nyentuk bulan November taun ke sama, aku ulih ngaga enggau nembuka lapan lambar kain buriek.

“Genap lambar kain buriek nya tadi lalu diberi aku ensumbar nitihka chura enggau ukir iya.

“Semua keranjai jari aku nya mega laku magang dibeli orang. Nya meh ke peransang aku nampung pengawa ngaga kain buriek nyentuk sehari tu,” ku iya temegah ati ngenang pemujur dagang kraf diri.

KELAS BURIEK SELAMPUR S’WAK

Ba ujung bulan September taun ke sama, Kanyan nguji muka Kelas Buriek ti dipunka iya ba Kapit dulu.

“Baka terubah nyual kain kangan buriek suba, aku nesau bala ti deka belajar nyait buriek tu mega nengah Facebook.

“Seninjik endar nerima mayuh timbal ti manah ari mensia mayuh, sida bepadah ngagai bala bukai ti sama rinduka pengawa tu.

“Pemujur kelas buriek ba Kapit, nyadika pun singkang aku ngerembaika kelas buriek tu ngagai selampur Sarawak udah nya.

“Laban agi bisi batang pengawa, dia pengawa pengelandik jari dikereja maya lepa ujung minggu, semadi ngisi awak kena ngapuska hari,” ku Kanyan.

Ari bulan Disember taun 2018 nyentuk September 2019, TBK udah muka 29 renggat Kelas Buri ba selampur Sarawak berengkah ba Kapit, Song, Sibu, Miri, Bintulu, Mukah, Betong, Sarikei, Saratok, Kanowit, Sri Aman, Serian enggau Kuching.

Udah nya ku Kanyan, Kelas Buriek diatur TBK rembus ngagai tanah Semenanjung Malaysia, nerima peminta ba Johor Bahru enggau Kuala Lumpur.

“Pemayuh tubuh bala anembiak kala diajar aku manggai 632 iku naka diatu.

“Nambahka nya, aku mega kala dikangauka bala ari gempung ukai dikuasa perintah (NGO) muka Kelas Buriek ungkup serakup enggau gerempung sebelah Kapit ditu.

“Kenyau ari nya, chap TBK majak dikelala mensia mayuh kelimpah udah nyual lebih 1,000 lambar kain kangan puang ngagai makit selampur Sarawak.

“Pia mega produk ari buriek pan mayuh digaga aku nyengkaum kain buriek (skirt tebuka enggau skirt amat), baju vest, baju gaun, sementing, selampai enggau sintung.

“Produk pemadu baru ari TBK iya nya Terabai Buriek bebingkai ti nerima mayuh peminta,” ku iya ngerintaika pengawa enggau produk TBK.

SEMAMPAI LAKU

Ngenang pasal pengawa ngelakuka produk kraf TBK ku Kanyan, iya bisi nemuai ngagai menua tasik kin ba ujung taun 2019 suba.

Lebuh nya iya milih enggau orang bejualka produk buriek ba menua London, Paris enggau Amsterdam.

Lebuh ba Landon, Kanyan semina mai tujuh lambar selampai lalu enam lambar mujur dibeli orang.

Ku iya, taja taun 2020 tu perintah bejalaika Atur Mindah Betagang (PKP) ketegal pengerekai Covid-19, tang produk TBK semampai bisi peminta.

“Produk buriek nadai kala pungkang nerima udar ari mensia mayuh nyengkaum sida ti tebangkar nama enggau orang dipebasa.

“TBK mega bisi nerima udar ari rayat menua luar baka ari menua Brunei Darussalam enggau Singapore din.

“Munyi ku aku madah tadi, produk kraf jari TBK semampai laku taja kitai meda enggau macha sebelah surat berita, mayuh dagang lungkup ketegal pandemik tu.

“Puji Tuhan laban semampai mudah gerah ngulihka jereki seraya ngerembai enggau ngangkatka kraf jari asal Iban Batang Rajang,” ku Kanyan.

TBK mega bisi ngeluarka siti da produk buriek Belanda, iya nya siti produk digaga ari kanchin baju, dijual mar agi ari rega kain buriek bukai.

Kelimpah ari nya, TBK ngaga buriek mit baka buriek lama ke alai kain buriek mit nya dijual mar agi laban leka buriek kering sereta teguh, enda mudah pechah.

“Taja udah dua taun tu enda ulih ngatur kus betemu mua enggau bedagang baka selama tang kami (TBK) bejalaika dagang ngena pelasar online.

“Kami endang nerima manah inisiatif perintah meransang pedagang ngena teknologi enggau pelasar e-dagang ngelaku enggau nyual produk.

“Baka aku empu, gerup WhatsApp enggau Facebook nya meh ke mayuh nyaup ngerembaika dagang kraf buriek aku ngelama tu, nadai betatak jam lalu meraka menua.

“Ari nya tadi, TBK majakka pengawa begagaka macham bansa produk ari buriek, diubah chura enggau ukir awakka manding dipeda lalu orang enda mega leju meda chura ti sama aja,” ku iya nerang pasal pejalai dagang TBK.

Sebedau PKP taun 2020 suba, nasip endar TBK bisi peluang ngatur pengerami makai lemai dikumbai Malam Gala Buriek 2020 diatur ba sebengkah hotel tebilang di Kuching.

Lebuh nya ku Kanyan, pengawa mujur datai ari kerejasama rat Catherine Charlie Ku enggau Malay Muli ke alai Direktor Unit Pekara Pengarap Bukai (Unifor), Richard Lon dipebasa pengerami lemai nya.

Taja pia ku iya, perambu ngatur pengerami Malam Gala Buriek ba Bagi Menua Sibu, Bagi Menua Miri enggau Bagi Menua Bintulu ditangguh dulu nganti Covid-19 pukas ila.

SEDIA BEKUNSI PENEMU

Dikena nyimpul kenang, besai pengarap Kanyan deka meda anembiak rebak baru ulih belajar enggau nampung pengawa pengelandik jari asal kitai Iban.

Nya kebuah ku iya, TBK sedia mantu enggau ngembing enggau ngajar rebak biak ba pengawa begagaka kraf jari.

“Enti bisi bala nembiak deka nemu pasal baka ni chara kitai ngetanka ngepan Iban, enggau ati lantang bekunsika penemu mengga mimit dikembuan tudah aku.

“Kitai enda tau rangka penemu laban ulah baka nya nadai mai penguntung munyi ku jaku sempama, buah ubi laun dikali buruk di pun, buah empasa laun diempa lunggar taun.

“Nya alai aku meransang bala nembiak anang enggai tauka malu betanya ngagai sida ke tuai, belajarka penemu, penau enggau pengelandik laban deka mai mayuh pengelebih enggau pengulih besai ngagai diri empu jemah,” ku iya nibarka jaku peransang.

Kanyan dekaka rebak baru ulih nengkebang produk ngepan asal kitai baka pua kumbu, buriek enggau manik jemah ila, bisi chap dagang ti mai identiti bansa Iban.

Dagang kraf nyata ulih nyungkak penatai pemisi ba ruang bilik siku-siku enti dikereja enggau ati puh, meruan sereta bebendar, ku Kanyan nyimpul randau.