Dagang temuai: Pemansut belanja baru S’wak

KUCHING: Sektor dagang temuai di Sarawak nyadi sektor baru ti tau meri penguntung ngagai menua tu.

Datuk Patinggi Abang Johari Tun Openg madah, orang Melayu ti tebal agi diau di kandang mengeri enggau tebing tasik lalu pekara tu manah amat ungkup sektor dagang temuai.

“Nangkup peminta tu ke alai perintah udah numbuhka Old Kuching Heritage Trail nyengkaum projek Darul Hana.

“Kitai udah ngemansangka kandang menua Tebing Sungai Kuching lalu deka seruran ngangkat manah genturung pendiau ditu,” ku iya.

Iya mansutka jaku nya rambau Pengerami SAMArindok Aidilfitri Amanah Khairat Yayasan Budaya Melayu Sarawak (AKYBMS) di sebuah hotel, ditu tadi.

Pia mega ku iya, kitai deka mantu numbuhka endur ti tau nerenakka daya idup kitai ditu lalu piak AKYBMS udah besai jasa ngetanka adat enggau daya idup Melayu Sarawak.

“Kitai ngemansangka menua tu nangkup peminta AKYBMS, baka kitai nangkup peminta bansa bukai, ambika chunto Dayak Cultural Foundation (DCF).

“AKYBMS udah mayuh jasa ngagai bansa Melayu Sarawak enggau sepenyampau RM20 juta diagihka sida taun tu,” ku iya nerang.

Kenu ku iya, Perintah Sarawak nadai kala bechiping tang meri bantu bela penyampau ngagai semua bansa nyengkaum Melayu, Iban, Bidayuh enggau Orang Ulu.

“Agih belanja diagih ungkup pemansang rayat menua tu asil ari penatai belanja ti diulih Sarawak empu.

“Aku beterima kasih laban diberi buah runding bejalaika chukai jualan sepenyampau lima peratus ba minyak enggau gis ti dikemisi kitai ditu,” ku iya nerang.

DIPEBASA… Penatai Datuk Patinggi Abang Johari Tun Openg ba Pengerami SAMArindok Aidilfitri Amanah Khairat Yayasan Budaya Melayu Sarawak (AKYBMS) di sebuah hotel, disambut bala temuai dipebasa bukai. – Gambar Ramidi Subari.