Dagin ribit majak laku

KUCHING: Dagin ribit majak laku bepelasarka ke peminta makit dirikod manggai 300 tan sebulan ari Kuala Lumpur aja.

Menteri Muda Pemansang Dagang Mit enggau Jelan Pemesai (PKS) Datuk Mohd Naroden Majais madah taja sebedau tu ribit semina ditupi baka mayau enggau ukui aja tang diatu ribit ditemu nyamai diempa kelimpah ulih ngubat penyakit.

‘Kelia kitai nupi ribit baka nupi mayau enggau ukui tang diatu dagin ribit bisi dijual enggau diempa sereta ulih ngubat penyakit.

‘Pia mega, ribit nyamai ditupi laban ulih beranak enam kali setaun,’ ku iya.

Naroden bejaku munyi nya ba Karnival Ribit enggau Dagang Koperasi di Wisma Sego ditu, kemari.

Ku iya, dagang dagin ribit ulih nyilih peminta dagin manuk laban peminta dagin tu majak ngerembai ngagai Singapura enggai China kelebih agi bansa Tionghua.

‘Taja pia, amat beguna endur nyaga kualiti dagin tu awakka dagang dagin ribit majak manah ngagai menua bukai.

‘Pia mega, menua kitai tau mantaika dagin ribit tu ngagai temuai menua luar laban isi ribit nyamai sereta lemi,’ ku iya.

Diatu, dagin ribit digaga nyadi dagang Koperasi ‘Keluarga’ Syeikh Affendi Kuching Berhad (Kokesa).

Penyanding Penemu Kokesa Affendi Udin madah dagin ribit nyamai agi ari dagin manuk sereta baruh lemak.

MANAH…Datuk Mohd Naroden Majais (dua kanan) megai ribit ba Karnival Ribit enggau Dagang Koperasi di Wisma Sego ditu, kemari. Gambar -RAMIDI SUBARI