Dalam pengidup mesti bisi juluk ati ke tinggi

MIRI: Ngembuan juluk ati ke tinggi entara ulah patut dikembuan kitai siku-siku enti deka nyapai pemujur sereta nyulut ba pengawa dikerindu.

Dayaanagha Paramanathan madah, enti kitai bisi juluk ati dia kitai bisi peransang deka ngemajuka diri lalu ransing ati ngambi ulih nyapai juluk ati diri.

“Juluk ati tu tau dikumbai kitai ‘pengingin’ ti deka meransang kitai gagit ngereja pengawa, enda mudah mantul ngapa ngulihka utai dikedeka ati.

“Taja pia, ngembuan juluk ati aja empai chukup enti kitai ngelusu enda liat ati enggau puh sereta enda keras ngereja pengawa nya.

“Nya alai kitai anang baka timau jampat medah tang patut nunda ulah tekura enggai enda tepantup di bandir,” ku iya lebuh dirandau Suara Sarawak, kemari.

NGINING GELAR KUMANG TIKAS ENTARABANSA… Dayaanagha Paramanathan tauka Lady D.

Anak penakan Iban – India asal ari menua benak pangka pasang nya chukup temegah ati lebuh dipadu menggi gelar Miss Petite Universe International Sarawak 2021 – Bagi Menua Miri.

Iya ti siru agi dikangau ngena nama Dayaana tauka Lady D madah, udah nyadi juluk ati iya ngelama tu deka menggi gelar nya.

Enti ulih ku iya, datai ba tikas entarabansa baka Miss Universe Malaysia 2020, Francisca Luhong James enggau Miss World Malaysia 2018, Larrisa Ping Liew.

“Terubah enggau orang bepekit suba, endang bisi penangi laban bangat nadai seling penemu pasal pengawa baka tu.

“Taja pia, ari jaku peransang enggau sukung kelebih agi indai aku empu, dia aku meranika diri enggau orang ngeruh ai.

“Aku mega nadai ngadang diri menggi gelar Miss Patriotic 2020 renggat pelilih menua diatur Tiara Management lebuh nya kelimpah bulih gelar Miss Darling ba pekit ke sama.

“Tu singkang keterubah ti udah ngerandang jalai ditengah aku ke diatu ke alai aku enggau dua iku bakih ke bukai deka bepekit ba renggat nasional udah tu,” ku Lady D mantaika tuchum manis.

Dua iku bakih iya ke udah dipilih menggi gelar Miss Petite Universe International Sarawak 2021 iya nya Ullia Ulanda (Limbang) enggau Mangala Sushmita (Bintulu).

Ungkup penerang, pekit pemajik gamal Miss Petite Universe International Sarawak (MPUIS) 2021 Limbang, Miri enggau Bintulu ke bisi 10 iku pemekit udah dipilih masuk renggat kepenudi.

INDAI KE PERANSANG… Lady D enggau indai dikesayau, Ronnytha Ason.

Suara Sarawak