Darurat ulih dipadam tumu, enti kes Covid-19 ulih tagang – Masing

KUCHING: Perintah Sarawak ulih minta ngagai Yang di-Pertuan Agong madamka darurat tumu ba menua tu enti nyema pengerekai Covid-19 ulih ditagang, ku Tan Sri Datuk Amar Dr James Jemut Masing.
Sapit Kepala Menteri nya madah, pekara tu dikena nentuka kitai ulih bejalaika Pengawa Bepilih Nengeri Ke-12 (PRN-12) laban nya patut dipejalai sebedau bulan June tu.
“Proklamasyen darurat nya diterit laban menua agi beperang ngelaban igi penyakit tu.
“Pia mega, darurat nya sebagi ari inisiatif perintah nagang pejalai mensia mayuh nyengkaum enda bejalaika pengawa bepilih.
“Tang enti Sarawak ulih ngurangka penyampau kes Covid-19, kitai engka ulih minta ngagai Yang di-Pertuan Agong ngelaungka Sarawak ari darurat lalu udah nya kitai ulih bejalaika pengawa bepilih,” ku iya nengah randau khas, apin lama ke udah.
Masing madahka, PRN-12 mesti dipejalai abis laun bulan June tu laban nya maya penggal Dun padam tang pekara nya bepanggai sekalika Sarawak ulih nurunka kes positif.
Yang di-Pertuan Agong kena 12 Januari tu tadi setuju bejalaika Darurat nyentuk 1 Ogos ba selampur menua ngambi nagang pengerekai Covid-19.
Lebuh ditanya sekalika timpuh darurat tau ngeruga Parti Gempung Parti Sarawak (GPS) bekimpin, Masing ti mega Presiden Parti Rakyat Sarawak (PRS) madahka pekara nya enda ngeruga pejalai sida.
“Pekara tu enda ngeruga GPS laban kitai udah bejalai ba selampur menua pengelama lima taun tu, nya kebuah kitai nadai pengirau pasal nya,” terang Masing.
“PSB baka parti politik bukai ti madahka sida manah tang semina orang Sarawak ke ulih madah sekalika sida betul tauka enda,” ku Masing.
Masing mansutka jaku nya lebuh ditanya sekalika GPS meda Parti Sarawak Bersatu (PSB) nya ngeruga penuduk Iban tauka enda maya pengawa bepilih ke deka datai.
Ku Masing, sida dalam PSB nya kaban politik ke suba lalu mensia mayuh nemu pengawa ke udah dikereja sida.
“Maya agi dalam perintah, nama pemansang dibai sida ngagai rayat? Sekeda ari sida nya suba menteri enggau pengari rayat perintah.
“Tu mih chunto pemadu manah enti sida bisi penau ngasuh Sarawak nyadi nengeri maju,” tandu iya.
Ku iya, Presiden PSB Datuk Seri Wong Soon Koh kala nyadi menteri kabinet nengeri pengelama 30 taun lalu nama pengawa ke udah dikereja iya sekumbang nyadi menteri.
“Enda aku nemu madah sekalika sida manah tauka enda tang teju ngagai rayat Sarawak ngaga pemutus. Nya aja, arapka sida gawa manah enti deka menang,” ku lalau Masing.