Datai beperesa Covid-19 sapa kala ngusung kedai renchit ba mua Klinik Ng Budu

SARATOK: Barang sapa kala ngusung kedai renchit ba mua Klinik Pengerai Nanga Budu dipinta nganjung diri swab test enggau lengkas.

Jaku tesau nya datai ari Opis Pengerai Pelilih Saratok ti madahka, sida ke dipinta ngaga swab test nya kala ngusung kedai renchit nya kena 13 nyentuk 21 Februari tu tadi.

Sida nya dipinta datai beperesa ba Klinik Pengerai Nanga Budu berengkah ari pagila, 24 Februari, urung pukul 8.30 pagi nyentuk 12 tengahari.

Berindik ari nya, Sapit Menteri Pengeluar Kuasa enggau Pengeraja Asal, Datuk Ali Biju minta mensia mayuh meri kerejasama penuh ngagai pengawa nya pagila.

“Aku ngarapka bala kita ke udah ditesau ulih datai ba Klinik Nanga Budu ungkup swab test nya.

“Kerejasama kita beguna amat nentuka menua kitai semampai likun enggau kuru ari igi penyakit ngambi Pelilih Saratok ulih mali ngagai zon gadung baru,” ku iya lebuh dirandau Suara Sarawak, tadi.

Ba lansa bukai, Ali madahka berita manah diterima ari Rumah Desmond Sungan, Kamidan Jaya ke alai pemutus peresa Covid-19 ke-2 sida serumah negatif.

“Pemutus 67 iku peranak dia negatif seraya dua iku agi nganti pemutus lalu udah dikuarantin ba Palan Kuarantin ba Victoria Inn Saratok.

“Peranak Rumah Desmond diasuh bepekul berengkah ari 9 Februari nyin tadi pengudah ngerikod siti kes positif ari sida serumah.

“Bala kami ba Palan Servis Komuniti Sitak Parlimen Saratok mega seruran nanyaka berita sida Desmond serumah enggau raban bejalaika pengawa.

“Besampika menua Saratok pulai likun lalu nadai kes positif nambah ngambi ulih ngubah Saratok nyadi Zon Gadung baru,” tandu Ali.

Ke penerang, Rumah Desmond abis timpuh bepekul pengelama 14 hari berengkah sehari tu.