Datuk Ali sedia melanja ungkus kuarantin di SMK Saratok

SARATOK: Sapit Menteri Pengeluar Kuasa enggau Pengeraja Asal, Datuk Ali Biju madahka diri sedia melanja semua ungkus pemakai enggau ai irup sida ti dikuarantin ba buding Sekula Sekondari (SMK) Saratok.

Ku iya, tu dikena nyaup ngelempungka tating belanja ditanggung raban sekula sekumbang bala nembiak betubuh 30 iku nya dikuarantin dia berengkah 6 haribulan nyentuk 19 Februari tu.

“Aku endang naka ulih mantu raban sekula mutarka penanggul tu pengubah siku ari nembiak sida ditemu positif Covid-19 ngujungka bala ke bisi kontak semak diasuh kuarantin ba buding.

“Kelimpah ari nya, kitai sedia ngeluarka belanja dikena nyamin bala nembiak dikuarantin pengelama 14 hari dia enda suntuk pemakai, ai irup sereta pengelantang sida diintu meruan,” ku iya ti mega Kaban Parlimen Saratok lebuh dirandau Suara Sarawak, kemari.

Ali madah, sida ba Palan Servis Komuniti Sitak Parlimen Saratok udah dipadahka raban ari SMK Saratok ke alai diatu 30 iku nembiak sekula nya diasuh diau ba buding ungkup kuarantin pengelama dua minggu.

“Bala sida nya datai ari 12 iku nembiak pulai hari enggau 18 iku nembiak diau bemalam ke nyadi kontak semak siku ari bakih sida ti ditukuka positif Covid-19, asal ari Rumah Sidah di Sungai Brangan ke diatu benung bejalaika atur bekurung.

“Nambahka nya, pemutus peresa tumu (Swab Test) ungkup 31 iku nembiak enggau 11 iku pengajar kena 8 Februari nyin tadi nunjukka negatif tang sida dipinta kuarantin 14 hari nyentuk peresa kedua dipejalai kena 17 Februari tu,” terang Adun Krian silik.

Nitihka penerang, endur diau sekumbang dikuarantin udah disikap manah ti diaduka bala pemantu pengatur nembiak enggau Pengajar ti nyadi Warden Buding lalu semua Atur Standard Pengawa (SOP) ti udah ditetapka Opis Menteri Pengerai (KKM) enggau Opis Penyangga Penusah Bagi Menua Betong endang diterit baka selama.

Berindik ari nya ku Ali, raban ari palan servis deka seruran matau enggau nyikap diri meri bantu ti diguna sida ke dikuarantin dia.

“Terima kasih besai ngagai raban ari Opis Penyangga Penusah Bagi Menua Betong, Opis Pelilih Saratok, Opis Pengerai Pelilih, Opis Pelajar Pelilih, Kaunsil Pelilih Saratok sereta raban SMK Saratok empu ti udah meri kerejasama rat nentuka pengawa nagang igi penyakit tu ari majak ngerekai deka mujur.

“Keringka ati semua kitai lalu sama besaup enggau raban gawa di luan ngambi pandemik tu jampat pukas,” ku Ali madah nyemetak.

Dulu ari nya, Opis Pengintu Pengelantang Mensia Mayuh (JKM) Saratok mega udah nganjung bantu pemakai ngagai bala nembiak ti dikuarantin ba buding sekula nya.

Suara Sarawak