Daun biru mayuh guna

KENYAU ari menya, tebal agi daya idup raban bansa Dayak Iban bepanggai ba utai tumbuh enggau utai idup dalam kampung.

Sekeda ari kitai ke diau mendam ba rumah panjai agi ngemeranka pengawa begiga utai sebelah kampung dikena beridup enggau ngereja pengawa.

Sebansa ari utai tumbuh ti ngembuan mayuh guna ba pengidup kitai besehari sehari iya nya daun biru ti tumbuh galak dalam kampung.

Daun biru tu sebansa utai tumbuh dalam kategori palma, bedaun besai ti segala enggau belipat lalu diameter ulih manggai 70 cm pemesai.

MAYUH GUNA… Gaya pun daun biru ditemu tumbuh galak dalam kampung.

ATAP

Enti agi suba, daun biru suah diambika atap laban rumpas enggau nyamai diadu, nadai mayuh kelikuh pengawa kelebih agi ke atap langkau umai.

Engkawan atap digaga ari buluh payan enggau buluh betong ti dibelah bela enggau dipansap nitihka pemanjai dikedeka lalu pemesai iya kira mesai tunjuk indu kitai tauka besai agi.

Tembu dipansap baru daun biru ke udah disuyak ari tangkai deka ditusuk ba engkawan nya tadi, utai ti suah dikena nusuk daun biru baka bila bemban tauka ngena wi danan ke udah diraut alus.

Daun biru ke udah disuyak lebuh ditusuk deka ditusun, beserak ba ujung pangan diri tauka ulih dilapis setengah dataika besatup ba pun lambar daun.

Udah nya baru atap deka dijembi dataika rangkai ngambika tan enggau enda mudah retai diempa panas enggau ujan, sebedau disanggit ba kasau langkau.

TEGUH… Daun biru ditusuk ke atap ti disanggit ke atap langkau.

TANGGI

Siti agi guna daun biru iya nya dikena ngaga tanggi tauka tanggui, sebansa kereban dikena gawa ba tanah, ngelindung diri ari panchar mata panas enggau basah laban ujan.

Sumbuk enggau daun tuai bela tau digagaka tanggi ti dijembi dulu sebedau ditusuk ngena jerumat enggau ubung ke besai lambar.

Orang tuai madah, tanggi digaga ari daun biru teguh enggau nyamai dikena laban lempung, enda ngasuh kitai ribat lebuh ngereja pengawa ba tanah.

Adap menua Kalimantan Timur, peranak menua nya ngangauka tanggi tu ngena nama Seraong, ti mayuh dikait ba dinding dikena ngelagu bilik besai.

Penyelai Seraong tu laban dilinsu ngena mayuh macham chura enggau langkar ukir Dayak ti ngembuan mayuh reti enggau ngayanka pengelandik sereta penau jari orang ke nusuk tanggi nya.

Seraong tu mega ditusukka leka marik ti bemacham chura nitihka ukir diturai atas daun biru nya, chukup manding dipeda mata.

Pekara tu bebida enggau kitai ba menua sepiak kitu, jarang meda tanggi dilagu manah baka nya, digaga dikena ngelagu bilik. Kitai ditu nangkupka tanggi lebuh gawa ba tanah.

ALUS… Lambar daun biru ke udah chukup rangkai dijembi digagaka tanggi.

BUNGAI PAPAN

Guna ketiga daun biru iya nya digagaka Bungai Papan ti nyau deka baka gamal bungai jarau tang enda geletang; burai lurus. Lebat agi burai dikelalin manah agi ga Bungai Papan dipeda.

Enti kelia, Bungai Papan tu semina dikena maya nikika Gawai Kenyalang enggau Gawai Kelingkang aja tang diatu ulih dikena ba sebarang gawai nyerumba pemansang dunya kemaya hari.

Bungai Papan mega enda ulih tembu sehari tang begunaka timpuh panjai laban mayuh rurun pengawa ti digaga ari sumbuk biru lalu dikelalin ngena wi ti diraut alus.

Enti ba kampung tuai, sumbuk biru tu deka manah agi belayan laban tumbuh besai, panjai enggau galak agi. Wi nyadika pemegai enggau ngelalin isang ari sumbuk biru ti udah disuyak sedang pemesai enggau penebal.

Batang wi deka dijembi dulu ba endur ti tampak panas dataika rangkai sebedau diraut ngena lungga seraya sumbuk biru diengkah ba endur ti teduh enggau lindung mata panas sereta enda kena basah tempias ujan.

Seminggu udah nya baru datai ba pengawa nyuyakka sumbuk biru, ngaga bila ke alai belayan sumbuk dicharik sedang pemesai. Tembu nyuyak sumbuk biru baru berengkah ngaga pemegai enggau endur ngelalin bila biru nya tadi, ti digaga segala.

Bila biru ti udah disuyak deka ditejuka rangkai dulu sebedau dikelalin ngena wi nitihka langkar bingkai ti udah digaga ari batang wi empu.

Kereja tu dipeda baka rumpas amat tang ke amat mayuh kelikuh sereta begunaka pengepuh tulang ngereja iya dataika tembu.

Bila biru ti udah rangkai deka dikelalin nitihka ripih ti diripih enggau meruan ngambika manding enggau manah dipeda mata lalu panjai agi bila biru, badas enggau manding agi iya dipeda. Tembu pengawa ngelalin baru iya tau dikumbai kitai Bungai Papan.

PEMAKAI ASAI… Selukung iya nya berau pulut ditepu dalam daun biru ke digaga segi tiga lalu direbus.

SELUKUNG

Lebuhka turun tauka ngereja pengawa sebelah tanah, kitai endang mai bekal ari rumah, abis nadai asi laban lauk bulu babas enggau jelu, ikan ulih digaga enggau dibela ba tanah.

Daun biru suah dikena nungkus asi ke bekal kelimpah ulih kena ngelempis tauka mais lauk baka anak ikan sungai ti digulai upa kechala.

Kelimpah ari nya, daun biru mega dikena nungkus selukung iya nya berau pulut ti dipanduk ngena periuk sekalika ungkup ke dempa tauka maya miring, ngayanka keduran.

Daun biru ke udah diperesi enggau dicharik, dijembi dulu ngambika layus sebedau nepuka berau pulut dalam nya, direbus dataika pulut mansau.

Bisi mega kitai meda orang ngaga senupat ngena sumbuk biru, lambar ke udah disuyah deka dianyam lalu ditepuka berau pulut. Enti udah mansau, asi pulut deka bau rengut.

Kitai mega suah beselapka daun biru lebuh mela lauk. Ambika chunto, lebuh netak jelu ke ulih ngasu, daun biru ke tuai diambi kena nyelap sengkalan endur ngelampang dagin enggau netak tulang jelu.

SIMPUL KENANG

Semua pengawa ke udah dilansa entara guna daun biru ba daya idup kitai ti ngemeranka pengawa di rumah panjai.

Mayuh rebak diatu engka nadai seling penemu tauka penerang pasal sekeda pengawa ke bisi kaul enggau daun biru tang kitai ngarapka ari penerang dikunsi sekali tu ulih mai sida ngelala enggau nemu reti pengidup aki ini kitai menya.

BUNGAI PAPAN… Tuai Sigat ngelalin isang ari sumbuk biru ke disuyak digaga nyadi Bungai Papan.