Daun tubu: Biching asal kitai

MENUA Kalimantan tu endang agi tubah pengeraja asal enggau kampung ba menua nya sigi agi mayuh bansa utai tumbuh ti dijaga peranak ba menua nya ngambi ulih dikelala bala nembiak rebak dudi.

Orang kelia sigi begunaka daun babas dikena nambahka asai lauk laban nadai biching baka kitai kemaya hari.

Lain menua lain ga bansa utai tumbuh tu disebut sida ke alai ba Kalimantan, daun tu dikumbai daun sengkuba.

Bebida ba Sarawak, bisi ngumbai daun tubu lalu bisi mega madahka tu daun sengkubai seraya raban bansa Kenyah ngumbai tu daun bukai.

Kitai Iban suah agi ngumbai tu daun tubu. Nitihka penemu sida ke tuai, daun tu deka dijembi dataika rangkai, udah nya baru ditaruh dalam butul ngambi tan lama.

NGULAI LAUK… Yusnita benung ngiga daun tubu dikena ngulai lauk.

Enti diperati, bisi penyelai ba nama daun tu nitihka menua enggau raban bansa tang guna iya tetap sama, dikena nambahka asai lauk baka kitai ke ngena biching diatu.

Komuniti suku Dayak ba Kabupaten Sintang, Kalimantan Barat (Kalbar) endang ngulai lauk ngena daun tubu ti suah ditemu ba tanah emperan enggau bukit.

“Daun tubu tumbuh galak ba tanah tinggi, lalu kami ba Kalimantan ngumbai tu daun sengkuba,” pia ku Yustina, peranak ba Pelilih Benua Kencana, Sintang ti kala nanam daun tubu.

Komuniti Dayak ba Pelilih Benua Kencana endang ngena daun tu dikena ngulai lauk babas, nambahka pemanis enggau penyamai.

“Enti suba, apai indai aku endang ngena daun sengkuba tu bepandukka lauk dalam taun 1969, nadai nemu utai ke dikumbai biching lebuh nya.

GALAK TUMBUH… Bansa daun tu agi mayuh ba menua kadap Kalimantan sereta nyamai digiga dalam kampung.

“Tambah mega, daun tu mayuh ditemu kitai lebuh mindah bejalai ba kampung.

“Enti deka nanam, ambi akar iya lalu tau ditanam ba mua rumah ngambi enda kiruh ngiga jauh ke dalam kampung,” tandu Yustina.

Yustina nerang, daun tubu tu ngundan asid glumatik ba daun iya lalu tu mih kebuah daun tubu ulih nambahka asai ba lauk disumai kitai.

“Kitai tau ngulai daun tu lebuh nyumai daun jabang ke alai daun tubu tu tau ditutuk tenyuh tauka diperuk ngambika lauk kitai nyamai.

“Tutuk bawang mirah, asai bisi masam mimit enti tekenaka daun ke agi muda.

“Enti sema kitai deka nyumai gulai enggau tubu, daun tu anang nutuk tang dichebik pia aja ngambika daun nya empa begulai,” lansa Yusnita sentang chara nyumai ngena daun tubu.

Yusnita mega madah, daun sengkuba tu bisi bebuah ke alai buah besai enggau segala kelimpah ulih muai rachun ari ai irup ti tau ngasuh mabuk.

“Bisi madahka buah daun tu ulih muai rachun enggau ngasuh kitai nakal lebuh ngirup ai bisa, kitai tau enda mabuk.

“Orang madah baka nya tang aku enda kala nguji sekalika amat tauka enda pengasi buah ari daun tubu tu.

Taja pia, Yusnita kala nguji makai buah tu lebuh berasai pedis rekung lalu ngasi amat.

Enti dikena nyumanka pedis rekung, buah nya direndam enggau ai angat, udah ai nya bisi bebali chura, baru tau irup ngambi nyumanka pedis rekung,” ku iya pasal buah tubu udah nyumanka iya ari pedis rekung.

Enti ba menua adap Kalimantan, daun tubu endang nyamai amat digiga sereta nyadi utai dagang dikena nambahka penatai pemisi laban peranak menua nya agi begunaka daun tu.

Nya kebuah, Yustina ngarapka daun tubu deka diinjin nyadi baka biching. Tambah mega, pemanah daun tu nadai ngundan bahan kimia, lauk nadai ngundan utai ti tau nganu pengerai.

Ba lansa sama, iya madahka daun sengkuba tu bisi dua bansa, baka daun kasar di tengah pun nya enda tau diempa laban kering lalu tau ngasuh kitai mabuk.

Ari sukut pengerai, daun tu manah amat dikena ngeraika sida ti renga enggau kembai buah lemba laban ngundan protein, karbohidrat, mineral enggau ai.

Nambahka nya, suku Dayak Siberuang enggau Melayu Sintang arapka buah ari daun sengkuba tu ulih digaga nyadi jimat ti ditanchang ngena kayu lukai enggau bawang mirah.

Nitihka pengarap sida, jimat tu ulih muru semengat jai lalu jimat tu deka ditunu ngambi ngeluarka sebun dikumbai merabun.

Ba raban bansa Melayu adap menua Kalimantan din, daun tubu tu bisi bansa bukai baka sengkuba machan, sengkuba sayur enggau sengkuba rebung.

Rebak biak engka enda ngelala daun ke mayuh guna tu laban sida udah bisi biching sereta enda ibuh kiruh begigaka daun dikena ngulai pemakai.

Bansa daun baka tu patut amat dijaga enggau manah lalu tau dijual laban asai iya jauh nyamai ari biching kelebih agi enti disumai gulai daun jabang enggau daun babas ke bukai.