Daya Iban beridup

JULAU: Kenyau ari menya raban bansa Dayak Iban tebilang landik ba jari nengkebang kereban nyadika daya ngidupka diri kelebih agi maya bumai betaun, ngasu jelu sereta pengawa ke bukai.

Pengajar Sipok Nyaiyang, 45 taun, ari Sungai Ensiring ditu madah, kitai ke diau di entigis sungai enggau menua ulu, jauh ari mengeri, endang ari mit diseridi nampung pengawa sida ke tuai.

Ku iya, bala nembiak ari umur biak diajar enggau dibai beban kayu ramu tauka beambika wi danan enggau utai tumbuh bukai dalam babas enggau kampung.

“Sida ke indu diajar ngintu pengawa di rumah panjai baka bebelaka pemakai, nyaup apai indai bumai, nyauk ai sereta dilalau enda ngelusu sereta lembau ngintu ruang bilik.

“Kami ke lelaki endang diajar lansik sereta pintar ba runding idup, sikar, kering sereta bagas gawa, nadai ngira pengawa di rumah panjai tauka di tanah.

MULAIKA PENGINGAT… Genuk tauka labu ke suah dikena sida ke indu nyauk ai agi disimpan nyentukka diatu.

“Semua pengawa tu nyadi daya kena kitai bansa ngidupka diri nyempulang bansa bukai lalu mengkang bisi dikereja dataika sehari tu,” ku iya lebuh dirandau Suara Sarawak.

Rebak baru mega enda tinggal diajar ngambi nemu bebasaka orang bukai, ngemeranka pemanah ulah lalu dilalau meretika jaku ajar sida ke tuai seraya nemu idup ngatika diri.

Kelimpah ari nya, kitai bansa ke diau di rumah panjai mega mengkang ngemeranka pengawa bumai betaun kelimpah ari pengawa di tanah ke bukai, bekebun sayur sereta betanamka buah, ku iya ngelansa.

Genap bengkah pengawa tu endang bisi kereban iya empu ngambika pengawa dikereja deka muntang agi, ku iya ti mega rinduka pengawa bekelinggai.

Antara kereban tauka perengka pemadu beguna ti bisi dikena raban bansa kitai ngereja pengawa bumai betaun iya nya beliung, kapak, duku, sumpit, laja, sangkuh, iluk, pengait, tugal seluk, sintung, ketap, lanji, tikai, bidai enggau ke bukai.

PEMANDANG… Sekeda ari kereban dikena nenun ubung nyadi kain, bisi mega bila kerupuk ke udah rangkai disandih ba dinding sebedau dianyam nyadi tikai.

Kenu ku iya, semua kereban tu endang ditempa asil ari penau enggau pengelandik jari lalu bisi sekeda kereban nya mar digaga, begunka pengalus tempa jari kitai siku-siku.

“Ambika chunto, pengawa ngambuh duku tauka utai tajam ke bukai, enda tau enda puh ngereja sereta liat ati kelimpah ngembuan ulah angkun nentuka asil utai dikambuh meruan sereta manah dipeda.

“Kitai mega deka puas ati meda pemanah asil ari tempa jari diri empu. Bala bukai mega rindu meda lalu deka nunda pemanah gamal tempa nya,” ku iya nambah.

Kelimpah ari nya ku iya, kitai mega suah bekenaka tikai tauka bidai dikena nyembi padi enggau buah asil ari kebun baka lada enggau koko.

Pengawa nampi, ngebau enggau berayarka padi mega suah ngena chapan, di tanju tauka tengah laman rumah.

ALUS… Sekeda ari lanji enggau tikai ke digaga ari pengalus anyam jari sida ke indu.

Suah mega pengawa nungku tauka ngindik padi dikereja ba ruai tauka di baruh rumah, lalu ruman nya tadi deka padi deka ditugung.

Enti sema pengawa tu dikereja di umai, dia tugung ruman padi deka jampat agi retai, ku iya seraya nikalka kenang agi ngemeranka pengawa bumai kelia.

Ba pengawa bumai sekalika bumai paya tauka bukit, kereban pemadu beguna dikena kitai iya nya tugal, dikena ngelubang tanah endur nabakka benih di umai bukit tauka nanam paung padi ngagai sida ke bumai paya.

Nya alai ku iya, tugal tu bisi mayuh macham bansa baka tugal sakom tauka tugal kurung, tugal engkerutak, tugal sulung enggau tugal ke bukai. Puak kayu ti deka digaga nyadi tugal besenggal-senggal ngambika nyamai dipegai maya nugal.

“Tebal agi tugal digaga ari kayu tebelian. Kebuah pia laban kayu tebelian tan lama lalu tugal tu puh disimpan nyentuk bepuluh taun.

BEBAN… Ramu rumah ke udah tembu disayat deka ditus lalu dijembi dataika chukup rangkai ngambika tan lama

“Pemanjai tugal mega kira sedepa lebih lalu pemesai iya kiraka mesai lengan nembiak mit.”

Nangkanka nya ku Sipok, ba pengawa bumai endang nadai ngelaung bekenaka sintung, ti disangking ba punggung lalu orang ti ngetau kedil agi dikereja sida ke indu lalu sida ke laki berangkut ngena lanji.

Kelimpah ari sintung, kitai bisi bekenaka raga, uyut, seluk, tanggi enggau ke bukai maya gawa di tanah, kelebih agi maya bumai.

Kereban ti dikumbai ketap dikena kitai ngetau tauka ngetas tangkai padi lalu pemesai enggau pemanjai ketap dikena nitih ku penau orang ngena iya.

“Lanji alai orang muangka pagi ti udah diengkah orang dalam sintung lalu disan sida ke laki pulaika langkau tauka ngagai rumah.

LIKUN… Gaya pendiau di rumah panjai ke agi bumai betaun meruan dikemeran dataika sehari tu.

“Sekeda ari kereban dikena ngaga lanji iya nya rutan sega, wi danan, tali temeran enggau randau kelait,” ku iya nerang silik.

Pengawa ngasu mega meruan dikemeran sida ke diau di rumah panjai. Pengawa tu suah dikereja maya hari diau lantang, bejalai ngiga pemakai ba sebelah babas tauka kampung sereta dikena ngintu pengawa lama baka begiga sebedau pengawa muai ulit dikereja.

Dulu suba ku iya, semina sumpit enggau laja sereta sangkuh aja ke suah dikena bejalai ngasu, tang diatu kitai nyau mansang agi, bekenaka senapang patah.

Pia mega ba pengawa berikan di sungai baka mansai, mukat, mubu, nubai enggau nginti, enggau pengawa din darat ngiga daun babas baka maku enggau nubu sereta ke bukai endang meruan dikereja datai ke diatu.

Pengawa bebanka kayu ramu sekalika kena berumah tauka digagaka perau di kampung udah diajar ngagai sida ke lelaki, ketegal pengidup kitai dulu menya mayuh agi bepanggai ba sungai, jalai kitai mindah enggau ngiga pemakai, lalu pengawa berumah endang dikereja diri serumah nengah pengawa beripai tauka beduruk.

“Suba kitai nadai kala bebelika ramu dikena berumah. Semua ramu rumah baka tiang, kasau, tulang perabung enggau ramu ke bukai endang ditebang, disayat kitai empu.

“Beban kayu kena ngaga perau mega nadai nanggul kitai laban sigi udah bisi pengelandik ba pengawa nya,” ku iya nampung kenang.

Ku iya, sida ke lelaki mega beratka kereban ungkup sida ke indu betenun, narit ubung enggau berayam, nya kebuah sida deka nyaup ngiga bemban, wi, kerupuk, senggang enggau bukai, dikena nambahka keresa ba bilik penait diri empu.

Nya kebuah ku iya, disempulang enggau mayuh macham kereban ti dikena maya kitai ngereja pengawa ba daya idup di menua endang nunjukka kitai Iban tu landik di tunjuk jari.

Ba lansa ke sama, meruan megai pengarap enggau adat lama, gaya pengidup peranak diau adap Batang Rajang endang agi semak enggau menua ke latung.

“Nya alai kaban belayan kitai dedin agi beratka pengawa bepiring ading maya ngepun tauka mungkal sekeda pengawa kena nyeliahka sebarang pekara enda disadang tau nyadi.

“Sida suah nirika teresang endur manggaika piring, suah mega nirika gawai sandau ngiga tauka nela nasit tubuh ke ngempu gawai.

“Tau mega dikumbai kitai biuh ari pemansang dunya kemaya hari ti ulih ngemuntangka pengawa ti berat, ulih lempung agi dikereja, kelebih agi rebak ke diatu napi pemansang digital ekonomi tauka e-dagang nyerumba bansa bukai,” ku iya nyimpul penemu diri.