KUCHING: Pemanis tuchum enggau pemajik gamal ngasuh ati akim tekait milih Dayaanagha Paramanathan menggi gelar Miss Patriotic 2020 ngalahka lapan iku penyereta bukai.
Ba pekit pemajik gamal renggat kepenudi diatur Tiara Management Beauty Pageant & Event Planner ngalihari tadi ba sebuah palan besai bebelika barang, endu Dayana,18 taun, penakan Iban India mega mujur menggi gelar Miss Darling.
“Aku sigi rindu enggau orang bepekit ti ukai semina mantaika pemajik gamal tang nguji pemintar runding, pengelandik bejaku enggau penau ba main asal nyengkaum belajarka penemu baru baka chara bejalai atas panggau enggau gaya begambar nitihka rambai jaku pekit.
“Juluk ati aku endang deka enggau orang bepekit ba renggat entarabansa, Miss Petite Universe taun baru lalu pekit sekali tu kira kena aku ngepunka singkang diri, bekelala dulu dunya pekit pemajik gamal tu,” ku iya lebuh dirandau Suara Sarawak.
Dayana madah, kenyau ari mit iya endang ngining meda bala kumang bepekit atas panggau nadai ngira kumang Gawai, Miss Universe tauka Miss World, lalu tu nyadika peransang iya ngulihka juluk ati nya.
Baka sekali tu ku iya, sida diajar mayuh macham penemu baru dikena ngansah pengelandik enggau penau diri kelimpah diajar chara mansutka penemu enggau bejaku ba mua mayuh.
“Pengesal ati din enda ibuh sebut, tang bai ati keran, paju ke aja singkang mai ati berani. Tambah mega apai indai enggau kami sebilik, bala bakih enda leju meri sukung ngagai aku.
“Ari sukung enggau jaku peransang sida ngasuh ati aku kering enggau liat agi maju ke mua,” ku iya.
Ungkup penerang, bisi tiga akim professional dipadu nyadi akim ba pekit Miss Patriotic New Normal 2020 iya nya Elizabeth Sharon, Haziq Nazir enggau Jennifer James.
