Dayak lenyau tanah enti PH merintah

KUCHING: Bansa Dayak deka lenyau tanah enti Pakatan Harapan (PH) megai perintah Sarawak, pia ku Kaban Komiti Tetinggi Parti Pesaka Bumiputera Bersatu (PBB) Datuk Ahmad Ibrahim.

Nya alai, iya nangkan komuniti asal ditu nulak PH maya Pengawa Bepilih Nengeri Ke-12 (PRN12).

“Enti PH megai Sarawak, kitai deka lenyau Tanah Adat Bansa Asal (NCR), kampung asal, temuda enggau dandang tanah ke bukai.

“Aku minta peranak Sarawak berunding panjai dikena nyaga menua tu enggau rayat,” ku iya ba penerang tadi.

Iya nimbal penerang dipansutka Menteri Besar Perak Ahmad Faizal Azumu madahka nengeri nya nadai tanah adat ungkup bansa asal nyengkaum Orang Asli.

Ku iya ti nyadi Chairman PH Perak, nitihka Undang-undang Tubuh Perintah Nengeri nadai tanah ti diaku nyadi tanah adat ungkup Orang Asli tauka raban bansa bukai.

Berindik ari nya, Ahmad ngasaika niat enggau penatai PH ke Sarawak deka negi enggau ngetan hak tanah NCR semina melakun aja.

“Nama niat PH datai kitu semina deka melakun aja negika NCR tang ba menua sida empu di Perak tauka Tanah Melayu enda ngaku tanah bansa asal menua nya,” ku Ahamd nerang.

Iya nyemetak madahka hak tanah NCR enggau peranak asal di Sarawak semina dijamin ulih dijaga di baruh pegai Gempung Parti Sarawak (GPS) ti udah terang ngaku tanah NCR nyengkaum Native Territorial Domain (NTD) iya nya mungkur 1,000 hektar di baruh Kanun Tanah Sarawak.

Nya kebuah, rayat Sarawak meseti nyaga Kanun Tanah Sarawak. Kitai bisi mayuh hak enggau pengelebih dirintai ba Sempekat Malaysia (MA63) enggau Konstitusyen Perintah Besai,” ku iya.

Ahmad Ibrahim